Qalibaf: ABŞ aviadaşıyıcıları bizim hərbi gücümüzə görə geri çəkilib
İran parlamentinin sədri Məhəmməd Bağır Qalibaf ABŞ-nin təyyarədaşıyan hərbi gəmilərinin əməliyyat bölgəsindən uzaqlaşmasını İranın hərbi çəkindirmə imkanlarının güclənməsi ilə əlaqələndirib.
Crossmedia.az xəbər verir ki, İranın “Mehr” xəbər agentliyi bu barədə məlumat yayıb.
Qalibaf bildirib ki, İranın hərbi potensialı son dövrdə əhəmiyyətli dərəcədə artıb və bu, ABŞ-nin regiondakı hərbi fəaliyyətinə təsir göstərib.
“Bu gün Amerika təyyarədaşıyanları niyə əməliyyat bölgəsindən uzaqlaşıb? Niyə əməliyyat məsafəsindən bu qədər geri çəkiliblər?” – deyə İran parlamentinin sədri sual edib.
O, ABŞ hərbi qüvvələrinin İranın yaratdığı təhlükəni birbaşa hiss etdiyini iddia edib.
“Çünki onlar təhlükəni öz gözləri ilə görüblər və bizim hərəkətlərimizin nəticələrini yaşayıblar. Biz artıq bu hərbi çəkindirmə qabiliyyətinə malikik”, – deyə Qalibaf vurğulayıb.
İran rəsmisi ölkəsinin hərbi imkanlarının genişlənməsini xarici təhdidlərə qarşı müdafiə qabiliyyətinin gücləndirilməsi baxımından mühüm hesab etdiyini bildirib.
Qeyd edək ki, Qalibafın ABŞ aviadaşıyıcılarının geri çəkilməsinin səbəbləri barədə açıqlaması İran tərəfinin qiymətləndirməsidir. ABŞ hərbi komandanlığı bu iddianı təsdiqləməyib.
11:15 12.11.2026
Oxunuş sayı: 34
