Çinin Tayvan yaxınlığındakı fəaliyyəti G7-ni narahat edir
“Böyük Yeddilik” (G7) ölkələrinin xarici işlər nazirləri Çinin Tayvanın şərq sahillərində artan fəaliyyətinin regional sabitliyə və beynəlxalq gəmiçiliyin təhlükəsizliyinə təhdid yaratdığını bildiriblər.
Crossmedia.az xəbər verir ki, G7 ölkələrinin xarici işlər nazirləri bu barədə birgə bəyanat yayıblar.
Noyabrın 9–10-da Parisdə keçirilən görüşdən sonra qəbul edilən bəyanatda Tayvan boğazında sülh və sabitliyin qorunmasının vacibliyi vurğulanıb.
Nazirlər Çinin Tayvanın şərq sahillərində getdikcə fəallaşan fəaliyyətinin regionda gərginliyi artırdığını, sərbəst gəmiçiliyə və beynəlxalq dəniz daşımalarına təhlükə yaratdığını qeyd ediblər.
G7 ölkələri güc tətbiqi, məcburetmə və ya güc tətbiqi hədəsi ilə mövcud vəziyyətin birtərəfli qaydada dəyişdirilməsinə qarşı olduqlarını bir daha bəyan ediblər.
Bəyanatda Tayvan boğazı ilə bağlı məsələlərin konstruktiv dialoq vasitəsilə sülh yolu ilə həllinə çağırış edilib.
Eyni zamanda, Tayvanın beynəlxalq təşkilatların fəaliyyətində mənalı iştirakına dəstək ifadə olunub.
Qeyd edək ki, Tayvan rəsmiləri Çinin iyun ayından etibarən adanın şərq sahillərində sahil mühafizəsi patrullarını intensivləşdirdiyini bildirirlər. Tayvan tərəfi bu fəaliyyətlərin mümkün dəniz blokadasına hazırlıq məqsədi daşıya biləcəyindən narahatdır.
Pekin isə Tayvanı öz ərazisinin bir hissəsi hesab edir və adanın Çinlə birləşdirilməsi mövqeyini müdafiə edir.
12:53 12.11.2026
Oxunuş sayı: 41
