“Titanik”dən 30 metr uzun gəmi bu səbəbə görə batırılıb
Əfsanəvi “Titanik” gəmisindən təxminən 30 metr uzun olan “SS United States” layneri ABŞ-nin Florida ştatı sahillərində qəsdən batırılıb. Məqsəd dünyanın ən böyük süni rifini yaratmaqdır.
Crossmedia.az xəbər verir ki, “Reuters” agentliyi bu barədə məlumat yayıb.
Noyabrın 11-də həyata keçirilən əməliyyat zamanı uzunluğu təxminən 302 metr olan gəmi Meksika körfəzində, Florida ştatının Destin şəhəri yaxınlığında suyun dibinə endirilib.
Laynerin batırılması üçün gövdəsində xüsusi dəliklər açılıb və suyun içəri dolması təmin edilib. Əməliyyat zamanı partlayıcı maddələrdən istifadə olunmayıb.
Gəminin təxminən 55 metr dərinlikdə yerləşməsi nəzərdə tutulub. Bu ərazinin gələcəkdə dəniz canlıları üçün yaşayış mühitinə və dalğıclar üçün turizm məkanına çevrilməsi planlaşdırılır.
1952-ci ildə istifadəyə verilən “SS United States” vaxtilə dünyanın ən sürətli sərnişin layneri olub və Atlantik okeanını keçmə sürətinə görə rekord müəyyənləşdirib.
1969-cu ildə istismardan çıxarılan gəmi uzun illər Filadelfiyada saxlanılıb.
Laynerin süni rifə çevrilməsi layihəsinin ümumi dəyəri təxminən 13 milyon dollar təşkil edir.
14:46 12.11.2026
Oxunuş sayı: 73
