Əməkhaqqının gizlədilməsi hallarının qarşısı alınır?
Azərbaycanda əməkhaqqının gizlədilməsi hallarının qarşısının alınması məqsədilə yeni elektron nəzarət mexanizminin hazırlanması nəzərdə tutulur. Yeni mexanizmə əsasən, əməkhaqqı və digər ödənişlər vahid elektron sistem üzərindən, işçinin sərbəst seçdiyi bank hesabına köçürüləcək. Bununla da əmək müqaviləsində göstərilən əməkhaqqı ilə işçiyə faktiki ödənilən məbləğin müqayisəsi, ödənişlərin gecikdirilməsi və azaldılması hallarına elektron nəzarət imkanının yaradılması hədəflənir.
Məsələ ilə bağlı müzakirələr fonunda bir sıra suallar yaranır: Yeni mexanizm əməkhaqqının gizlədilməsinin qarşısını nə dərəcədə ala biləcək?
Mövzu ilə bağlı Crossmedia.az-a açıqlama verən bank məsələləri üzrə ekspert Əkrəm Həsənov qeyd edib ki, bu mexanizmin əməkhaqqının gizlədilən hissəsinin aşkar edilməsinə xidmət edəcəyi inandırıcı deyil: “Çünki əməkhaqqının gizlədilən hissəsi, bir qayda olaraq, bank hesabı vasitəsilə deyil, nağd şəkildə ödənilir. Hesab edirəm ki, bu mexanizm daha çox işçinin əməkhaqqını hansı bank vasitəsilə alacağını özü müəyyən etməsinə xidmət edəcək. Hazırkı vəziyyətdə işəgötürənin işçi üçün əməkhaqqının hansı bank vasitəsilə ödəniləcəyini müəyyən etməsi düzgün deyil və qanunvericiliyin tələblərinə ziddir. Bu, həm əmək hüququ baxımından, həm də mülki hüququn prinsipləri baxımından qəbuledilməzdir. Heç kəs işçini məcburi qaydada hər hansı bankın müştərisi olmağa vadar edə bilməz. Bank hesabının açılması və bank xidmətlərindən istifadə könüllülük prinsipinə əsaslanmalıdır”.
Ayhan
16:00 12.11.2026
Oxunuş sayı: 35
