İranın davranışları dövlətlərarası münasibətlərə zərbə vurur- Parlamentari
İranın 14 vətəndaşının Azərbaycan tərəfindən “arzuolunmaz şəxs” elan edilməsi iki ölkə arasında diplomatik gərginliyi yenidən gündəmə gətirib. İran Xarici İşlər Nazirliyinin sözçüsü İsmayıl Bəqayi Azərbaycanın bu qərarına etiraz etdiklərini, Tehrandakı Azərbaycan səfirinin Xarici İşlər Nazirliyinə dəvət olunaraq rəsmi etirazın ona çatdırıldığını bildirib. Bəqayi sözügedən şəxslərin diplomat olmadığını və Azərbaycanda olmadıqlarını əsas gətirərək, qərarı dostcasına addım kimi qiymətləndirməyib.
Maraqlıdır, İranın bu etirazı Azərbaycan-İran münasibətlərinə necə təsir göstərə bilər? Rəsmi Tehranın mövqeyi iki ölkə arasında onsuz da həssas olan münasibətlərdə yeni gərginlik yarada bilərmi?
Mövzu ilə bağlı Crossmedia.az-a açıqlama verən Milli Məclisin deputatı Nəsib Məhəməliyev qeyd edib ki, Azərbaycan Xarici İşlər Nazirliyinin İranın 14 vətəndaşının “arzuolunmaz şəxs” elan edilməsi ilə bağlı qərarı tamamilə beynəlxalq hüquq normalarına uyğundur: “Çünki həmin şəxslər Azərbaycan Respublikasının konstitusion quruluşuna və dövlət təhlükəsizliyinə təhdid yaradan fəaliyyətlə məşğul olublar. Onlar müxtəlif çağırışlar səsləndirərək əhalini dövlətə qarşı yönləndirməyə çalışıblar, Azərbaycan Respublikasının əleyhinə çoxsaylı bəyanatlarla çıxış ediblər. Bu baxımdan, Azərbaycanın qəbul etdiyi qərarda hər hansı qanun pozuntusundan söhbət gedə bilməz. İran Xarici İşlər Nazirliyinin sözçüsünün həmin şəxslərin diplomat olmadığını, adi vətəndaşlar olduğunu vurğulaması isə onun hüquqi baxımdan məsələyə düzgün yanaşmadığını göstərir. Çünki heç bir dövlətin qanunvericiliyində hüquqi məsuliyyət yalnız konkret peşə və ya vəzifə sahiblərinə şamil edilmir. Burada söhbət konkret şəxslərin törətdikləri əməllərdən və onların hüquqi məsuliyyətindən gedir. Fərqi yoxdur, həmin şəxs adi vətəndaşdır, diplomatdır, hərbçidir, deputatdır, yaxud yüksək vəzifəli dövlət məmurudur. Cinayət qanunvericiliyində konkret maddələr müəyyən edilib və həmin maddələrin tələblərini pozan hər bir şəxs qanun qarşısında məsuliyyət daşıyır. Bu baxımdan, İran Xarici İşlər Nazirliyinin sözçüsünün məsələyə münasibəti hüquqi arqumentlərdən daha çox, siyasi yanaşmanı əks etdirir”.
Deputat qeyd edib ki, digər tərəfdən, Azərbaycan tərəfindən atılan bu addımı düşmənçilik hərəkəti kimi təqdim etmək düzgün deyil: “Əslində, Azərbaycanın deyil, məhz qarşı tərəfin davranışları dövlətlərarası münasibətlərə zərbə vurur. Azərbaycan dövləti heç vaxt İranın ərazi bütövlüyünü və suverenliyini şübhə altına alan bəyanatlar səsləndirməyib, İranda hər hansı separatçı qüvvəni dövlət səviyyəsində dəstəkləməyib. Eyni zamanda, dəfələrlə müxtəlif xarici qüvvələr Azərbaycandan istifadə edərək İrana qarşı müəyyən layihələr həyata keçirməyə çalışsalar da, ölkəmiz buna imkan verməyib. Azərbaycan üçüncü dövlətlərin öz ərazisindən İrana qarşı istifadə etməsinə şərait yaratmayıb və bu məsələdə prinsipial mövqe nümayiş etdirib. Bu baxımdan, İran tərəfindən həmin 14 şəxsin fəaliyyəti və səsləndirdikləri fikirlər Azərbaycanla münasibətlərdə düşmənçilik addımı kimi qiymətləndirilə bilər. Belə davranışlar nə mehriban qonşuluq, nə dostluq, nə də suveren dövlətlərin qarşılıqlı hörmət prinsipləri ilə uzlaşır. Bütün bunlar bir daha göstərir ki, İran təəssüf ki, Azərbaycana münasibətdə siyasətində ciddi dəyişiklik etmək niyyətində deyil. Bu isə təbii olaraq təəssüf doğurur”.
Ayhan
17:35 11.11.2026
Oxunuş sayı: 49
