Ərdoğan: Bəşəriyyət tarixinin ən dərin böhranlarından birini yaşayır
Türkiyə Prezidenti Rəcəb Tayyib Ərdoğan həddindən artıq istehlakın və insan tamahkarlığının dünyanı ciddi ekoloji böhranla üz-üzə qoyduğunu bildirib.
Crossmedia.az xəbər verir ki, o, bu açıqlamanı COP31 Liderlər Sammitindəki çıxışı əsnasında səsləndirib.
Türkiyə Prezidenti bəşəriyyətin ortaq gələcəyinin qorunmasının vacibliyini vurğulayaraq təbii sərvətlərdən məsuliyyətlə istifadə edilməsinə çağırıb.
“Bəşəriyyət olaraq evimizin yalnız bir damı var – o da səmadır. Evimizin yalnız bir bağı var – o da Yer kürəsidir”, – deyə Ərdoğan bildirib.
O, planetin və təbii ehtiyatların əvəzolunmaz olduğunu diqqətə çatdırıb.
“Bunu çox açıq şəkildə demək istəyirəm: bizim başqa səmamız, başqa Yer kürəmiz, başqa dənizlərimiz, okeanlarımız və meşələrimiz yoxdur”, – deyə Türkiyə lideri vurğulayıb.
Ərdoğan qeyd edib ki, insanların həddindən artıq istehlaka meyli qlobal problemləri daha da dərinləşdirir.
“Lakin bu gün qismən həddindən artıq istehlak hərisliyinin təsiri ilə bəşəriyyət öz tarixinin bəlkə də ən dərin varlıq böhranlarından birini yaşayır”, – deyə o əlavə edib.
16:44 11.11.2026
Oxunuş sayı: 38
