Cəmiyyət

Ailə qurmaq istəyən gənclərə dövlət dəstəyi genişləndirilə bilər

Ailə qurmaq hər bir insanın həyatında mühüm mərhələlərdən biri olsa da, müasir dövrdə bu qərarı vermək bir çox gənc üçün getdikcə çətinləşir. Xüsusilə mənzil bazarında qiymətlərin yüksək olması, kirayə xərcləri, gündəlik ərzaq məhsullarının bahalaşması və ailənin saxlanılması üçün tələb olunan maliyyə imkanları gənclərin evlilik planlarına ciddi təsir göstərir. Bəziləri ailə qurmaq istəsə də, maddi imkanların kifayət etməməsi səbəbindən bu addımı təxirə salır. Digər tərəfdən, demoqrafik inkişaf və gənc ailələrin sosial rifahının yaxşılaşdırılması dövlət siyasətinin də diqqət yetirməli olduğu məsələlərdəndir. Bəs Azərbaycanda yeni ailə quran şəxslərə xüsusi dövlət dəstəyinin göstərilməsi mümkündürmü?

Millət vəkili Vüqar Bayramov Crossmedia.az-a açıqlamasında bildirib ki, hazırda gənc ailələr üçün güzəştli ipoteka kreditləri təklif olunur:

“Bu kreditlərin əsas məqsədi gənc ailələrin mənzil problemlərinin həllinə dəstək göstərməkdir.

Bizim təklifimiz güzəştli ipoteka kreditlərinin şərtlərinə yenidən baxılması və onların təkmilləşdirilməsi ilə bağlıdır. Belə ki, uzun müddətdir güzəştli ipoteka kreditləri üzrə maksimum məbləğ 100 min manat müəyyən edilib. Lakin son illərdə əmlak bazarında qiymətlər əhəmiyyətli dərəcədə artıb. Bu səbəbdən həmin məbləğin də dəyişdirilməsinə ehtiyac var.

İlkin olaraq güzəştli ipoteka kreditlərinin maksimum məbləğinin adi ipoteka kreditlərində olduğu kimi 100 min manatdan 150 min manata çatdırılması daha məqsədəuyğun olardı.

Eyni zamanda, nəzərə almaq lazımdır ki, ipoteka krediti götürənlərin əksəriyyəti Bakı şəhərində mənzil almağa üstünlük verir. Halbuki rayonlarda ixtisaslı kadrların işlə təmin olunması və mənzil şəraitinin yaxşılaşdırılması baxımından güzəştli ipoteka imkanlarının genişləndirilməsi vacibdir. Bu baxımdan digər təklifimiz rayonlarda güzəştli ipoteka kreditlərinin daha aşağı faizlə təklif olunmasıdır. Bu, regionlarda yaşayan vətəndaşların kreditlərdən istifadə edərək mənzil almasına, xüsusilə də gənc ailələrin mənzil təminatının yaxşılaşdırılmasına şərait yarada bilər.

Ümumiyyətlə, dünya təcrübəsində dövlət dəstəyi yalnız birbaşa mənzil verilməsi ilə məhdudlaşmır. Güzəştli şərtlərlə kreditlərin təklif olunması və kirayə mənzil proqramlarının genişləndirilməsi də geniş tətbiq olunan mexanizmlərdəndir.

Bu baxımdan biz də güzəştli ipoteka kreditlərinin şərtlərinin təkmilləşdirilməsini, mövcud imkanların genişləndirilməsini və bununla da gənc ailələrin mənzil təminatına dövlət dəstəyinin artırılmasını təklif edirik”.

Məhəbbət Tərlanoğlu

🖨 Çap et

14:50 11.11.2026

Oxunuş sayı: 21