Azərbaycan-Pakistan münasibətləri nümunəvi xarakter daşıyır- Deputat
Azərbaycan-Pakistan münasibətləri son illərdə strateji tərəfdaşlıqdan müttəfiqlik səviyyəsinə yüksələrək regionun ən möhkəm dövlətlərarası əlaqələrindən birinə çevrilib. Siyasi və diplomatik müstəvidə qarşılıqlı dəstək, müdafiə sənayesi sahəsində əməkdaşlıq, iqtisadi və investisiya əlaqələrinin genişləndirilməsi iki ölkə arasındakı münasibətlərin əsas istiqamətlərini təşkil edir. Xüsusilə Pakistanın Azərbaycanın ərazi bütövlüyünə və suverenliyinə verdiyi ardıcıl dəstək, rəsmi Bakının da İslamabadla münasibətlərin dərinləşdirilməsinə verdiyi önəm bu tərəfdaşlığın siyasi mahiyyətini müəyyənləşdirir. Qlobal geosiyasi gərginliklərin və dövlətlərarası etimadsızlığın artdığı indiki dövrdə Azərbaycan-Pakistan münasibətləri həm də qarşılıqlı etimada əsaslanan əməkdaşlıq modeli kimi diqqət çəkir. Bəs iki ölkə arasında mövcud strateji müttəfiqlik hansı potensiala malikdir və bu münasibətlərin gələcək inkişaf perspektivləri nədən ibarətdir?
Mövzu ilə bağlı Crossmedia.az-a açıqlama verən Milli Məclisin deputatı Elman Nəsirov qeyd edib ki, bu gün dünyada dövlətlərarası münasibətlərdə qeyri-müəyyənlik və etimadsızlıq mühiti hökm sürür: “Belə bir şəraitdə Azərbaycan-Pakistan münasibətləri nümunəvi xarakter daşıyır. Dövlətlərarası münasibətlərin necə qurulmalı olduğu sualına cavab axtarırıqsa, uzağa getməyə ehtiyac yoxdur: Azərbaycan-Pakistan münasibətlərinin xarakterini və fəlsəfəsini araşdırmaq kifayətdir. Azərbaycan və Pakistan strateji tərəfdaş dövlətlərdir. Fundamental məsələlərdə mövqelərimiz üst-üstə düşür. Xüsusilə siyasi və diplomatik əlaqələrimiz ən yüksək səviyyəyə çatıb. Rəsmi İslamabad Azərbaycanın haqq işini hər zaman birmənalı şəkildə müdafiə edib və bu gün də həmin mövqeyinə sadiqdir. Ermənistan-Azərbaycan münaqişəsi dövründə də Pakistan Azərbaycanın ərazi bütövlüyünü və suverenliyini qətiyyətlə dəstəkləyən dövlətlərdən biri olub. Eyni zamanda, Pakistan Ermənistanla diplomatik münasibətlər qurmayıb və bu günə qədər də həmin siyasətinə sadiq qalır. İki ölkə arasında diplomatik münasibətlər 1992-ci il iyunun 9-da qurulub. Həmin vaxtdan etibarən əlaqələrimiz davamlı şəkildə inkişaf edib və bu gün siyasi dialoqumuz ən yüksək səviyyədədir”.
Deputat qeyd edib ki, 2024-cü ilin iyul ayında Azərbaycan Prezidenti İlham Əliyevin Pakistana dövlət səfəri baş tutub: “Səfər çərçivəsində bir sıra strateji əhəmiyyətli istiqamətlər üzrə razılaşmalar əldə edilib. Prezident İlham Əliyev Azərbaycanın Pakistana 2 milyard ABŞ dolları həcmində investisiya yatırmaq niyyətində olduğunu da vurğulayıb. Əlaqələrimiz yalnız siyasi və diplomatik sahə ilə məhdudlaşmır. Hərbi və müdafiə sahəsində də əməkdaşlığımız dinamik şəkildə inkişaf edir. Azərbaycan və Pakistan arasında birgə hərbi təlimlər keçirilir, hərbi-texniki əməkdaşlıq genişləndirilir. Azərbaycan Pakistandan müasir silah və hərbi texnika nümunələri əldə edir. Pakistanın siyasi rəhbərliyi də hər zaman Azərbaycanın yanında olduğunu nümayiş etdirir və ölkəmizə dəstəyini açıq şəkildə ifadə edir. İqtisadi əlaqələrimiz də hazırda sürətlə inkişaf edir. Xüsusilə iqtisadiyyat, investisiyalar, kənd təsərrüfatı, nəqliyyat, logistika və enerji sahələrində tərəflər arasında sıx əməkdaşlıq mövcuddur. Bu istiqamətlərin hər biri geniş inkişaf potensialına malikdir. Azərbaycan Pakistanla strateji tərəfdaşlıq münasibətlərinin daha da möhkəmləndirilməsində və inkişafında maraqlıdır. Pakistan dünyanın ən çox əhaliyə malik dövlətlərindən biridir. Ölkənin əhalisi 250 milyondan çoxdur. Eyni zamanda, Pakistan müsəlman dünyasında nüvə silahına malik yeganə dövlətdir. 1998-ci ildə nüvə sınaqları keçirən Pakistan bu gün dünyada nüvə silahına malik doqquz dövlətdən biridir. Bu amil də onun beynəlxalq siyasi sistemdəki mövqeyini və strateji əhəmiyyətini müəyyənləşdirən əsas faktorlardandır”.
E.Nəsirov qeyd edib ki, Pakistanın Baş naziri Şahbaz Şərifin Azərbaycana səfərləri zamanı da hər iki ölkənin fundamental məsələlərdə ortaq mövqeyə malik olduğu, qarşılıqlı maraqlarının üst-üstə düşdüyü xüsusi vurğulanıb: “Pakistan Azərbaycanın təhlükəsizlik məsələlərində və iqtisadi inkişafında maraqlı tərəfdir. Rəsmi İslamabad bu sahələrdə Azərbaycanla əməkdaşlığı daha da genişləndirmək niyyətini dəfələrlə ifadə edib. Dövlət başçıları arasındakı dostluq münasibətləri, xalqlarımız arasında tarixən formalaşmış qardaşlıq bağları və qarşılıqlı etimad əlaqələrimizin yüksək səviyyəyə çatmasında mühüm rol oynayır. Bu münasibətlərin gələcək inkişafı üçün də kifayət qədər geniş perspektivlər mövcuddur. Xüsusilə Pakistanın Baş naziri Şahbaz Şərifin ötən il Bakıda keçirilən Zəfər paradında iştirakı Azərbaycan-Pakistan dostluğunun, qardaşlığının və strateji müttəfiqliyinin növbəti bariz nümunəsi oldu. Bu iştirak bir daha göstərdi ki, Pakistan Azərbaycanın sevincini və qələbəsini öz qələbəsi kimi qəbul edir”.
Ayhan
17:03 11.11.2026
Oxunuş sayı: 46
