“Spring Awakening” musiqilərinin müəllifi Dunkan Şeyk 56 yaşında vəfat edib
“Spring Awakening” müziklinin musiqilərini bəstələyən, Toni və Qremmi mükafatları laureatı müğənni-bəstəkar Dunkan Şeyk 56 yaşında vəfat edib.
Crossmedia.az xəbər verir ki, Associated Press bu barədə məlumat yayıb.
Şeykin ölüm xəbəri cümə axşamı onun Instagram hesabında paylaşılan açıqlama ilə təsdiqlənib. Açıqlamada sənətçinin musiqi və teatr dünyasında mühüm iz qoyduğu və yaradıcılığının gələcək nəsillərə ilham verməyə davam edəcəyi bildirilib.
O, uzun müddət “Barely Breathing” mahnısı ilə tanınıb. Mahnı Billboard Hot 100 siyahısında 55 həftə qalaraq 16-cı pilləyə qədər yüksəlib.
Şeyk daha sonra Brodveyə üz tutaraq “Spring Awakening” müziklinin musiqilərini hazırlayıb. 2006-cı ildə səhnəyə qoyulan əsər 860-dan çox tamaşada nümayiş etdirilib və Toni mükafatlarına çoxsaylı nominasiyalar qazanıb.
Sənətçi “American Psycho” və “Alice in Wonderland” əsərləri əsasında hazırlanan müzikllərdə də çalışıb. “Spring Awakening” isə onun yaradıcılığının ən çox tanınan işlərindən biri olaraq qalır.
05:12 20.09.2026
Oxunuş sayı: 43
