Xarici xəbərlər

Ukraynada Azərbaycanın tarixi ilə bağlı yeni kitab nəşr olunub

Ukraynada Azərbaycanın tarixi irsi və müasir Ermənistan ərazisində azərbaycanlıların keçmişinə həsr olunmuş yeni kitab nəşr olunub.

Crossmedia.az xəbər verir ki, “İtmiş sivilizasiya – Görünməyən fəlakət” adlı kitab Kuzari təxəllüsü ilə fəaliyyət göstərən ukraynalı tarixçi tərəfindən hazırlanıb.

Nəşr tədqiqatın Ukrayna dilində kağız formatında yayımlandığı ilk ölkədir. Kitabda əsas diqqət tarixi İrəvan quberniyası və Zəngəzur ərazilərində azərbaycanlıların və onların əcdadlarının tarixinin araşdırılmasına yönəldilib.

Müəllif regiondakı şəhər və kəndlərin tarixini, burada yaşayan azərbaycanlıların mədəni həyatdakı rolunu, sonrakı demoqrafik dəyişiklikləri, zorakılıq, qovulma və deportasiya proseslərini araşdırıb. Tədqiqatda məscidlər, qəbiristanlıqlar, qalalar və digər mədəni irs nümunələri ilə bağlı materiallara da yer verilib.

Kitabda ümumilikdə 1 765 mənbənin sistemləşdirildiyi bildirilir. Bunlar arasında arxiv sənədləri, erməni müəlliflərinin tarixi əsərləri, Rusiya imperiyası və sovet dövrünə aid rəsmi sənədlər, Fransa diplomatik materialları və digər mənbələr yer alır.

Nəşr foto və video materialları, deportasiyalardan sağ çıxan şəxslərlə müsahibələr və XIV-XX əsrləri əhatə edən xronologiya ilə də tamamlanıb. Kitabın elektron versiyası, arxiv sənədləri və digər materiallar layihənin internet platformasında təqdim olunur.

Nəşriyyat qrupunun məlumatına görə, kitabın Polşa, Almaniya, Baltikyanı ölkələr, Moldova, Qazaxıstan və Özbəkistanda da nəşr olunması planlaşdırılır.

🖨 Çap et

21:17 19.09.2026

Oxunuş sayı: 42