B’Tselem İsraili fələstinliləri sıxışdırmaqda ittiham edib
İsrailin işğal altındakı İordan çayının qərb sahilində fələstinlilərin ərazidən sıxışdırılması və İsrail nəzarətinin möhkəmləndirilməsinə yönəlmiş sistemli siyasət həyata keçirdiyi iddia olunur.
Crossmedia.az xəbər verir ki, İsrailin insan hüquqları təşkilatı B’Tselem bu barədə hazırladığı yeni hesabatda məlumat yayıb.
Təşkilat hesabatında İordan çayının qərb sahilində zorakılığın artması, fələstinlilərin hərəkət imkanlarının məhdudlaşdırılması, torpaqların ələ keçirilməsi, yaşayış məntəqələrinin boşaldılması və fələstinlilərə məxsus əmlakın dağıdılması kimi halların genişləndiyini bildirib. B’Tselem bu tədbirlərin ayrı-ayrı hadisələr deyil, bir-biri ilə əlaqəli siyasətin tərkib hissəsi olduğunu qeyd edib.
Təşkilatın icraçı direktoru Yuli Novak bildirib ki, sözügedən siyasət yalnız hazırkı İsrail hökumətinin dövründə və ya 2023-cü il oktyabrın 7-dən sonra başlamayıb. Onun sözlərinə görə, fələstinlilərin ərazilərdəki kollektiv həyatını zəiflədən yanaşmalar müxtəlif formalarda daha əvvəl də tətbiq olunub.
B’Tselem hesabatında bu siyasətin əsas istiqamətləri kimi zorakılıq, etnik təmizləmə, hərəkət məhdudiyyətləri, iqtisadi təzyiq, həmçinin sosial və siyasi həyatın zəiflədilməsini göstərib. Təşkilatın qənaətinə görə, bu tədbirlər fələstinlilərin öz torpaqlarında icma kimi yaşamasını çətinləşdirir.
Novak Qəzza sektorundakı vəziyyətə də toxunaraq, burada prosesin daha ağır forma aldığını və bunu “soyqırım” kimi qiymətləndirdiklərini bildirib. O, beynəlxalq ictimaiyyətin İsrailin siyasətinə reaksiyasının yetərli olmadığını deyib.
09:51 15.09.2026
Oxunuş sayı: 45
