Mərkəz islahat icmalı sənədini təqdim etdi
Azərbaycan Respublikası İqtisadi İslahatların Təhlili və Kommunikasiya Mərkəzi dekabr ayında "İslahat İcmalı" sənədini ictimaiyyətə təqdim edib. Vətəndaşların sosial rifahı və iqtisadi inkişafla bağlı diaqramlardan ibarət statistikanın əks olunduğu icmal Prezident İlham Əliyevin Milli Məclisin 23 sentyabr 2024-cü il tarixli yeddinci çağırış ilk iclasında çıxışı ilə başlayır: "Bizim gələcək planlarımızı həll etmək, o cümlədən vətəndaşların sosial rifahını yaxşılaşdırmaq üçün iqtisadiyyat daim inkişaf etməlidir".
İcmalda qeyd olunur ki, beşinci sosial islahat paketi ümumilikdə 3 milyon insanı əhatə edir və onun həyata keçirilməsi üçün 1,4 milyard manat maliyyə vəsaiti ayrılıb.
İslahatların əsas istiqaməti bunlar olub:
•Minimum əməkhaqqının artırılması – daha çox işçinin rifahını yaxşılaşdırmaq məqsədilə.
•Pensiyaların yüksəldilməsi – pensiyaçılar üçün daha sabit gəlir təminatı.
•Vahid tarif cədvəli üzrə əməkhaqqı artımları – dövlət sektorunda çalışan işçilərin maaşlarının 14% artırılması planlaşdırılır.
Sənəddə daha sonra qeyd olunur: "2025-ci ildə Dövlət Sosial Müdafiə Fondunun büdcəsi 10,5% artımla 7,676 milyon manata çatdırılacaq. Eyni zamanda, İşsizlikdən Sığorta Fondunun büdcəsi 6,6% artırılaraq 260,7 milyon manata yüksələcək.
İdman sahəsində çalışan seleksiya üzrə baş mütəxəssislərin maaşları 16% artırılaraq 2025-ci ildə 1425 manata çatdırılacaq. Dövlət qurumlarında dövlət qulluqçusu olmayan işçilərin əməkhaqları da yenilənərək daha yüksək səviyyəyə çatdırılır".
Nihat Tahirov
12:17 29.12.2024
Oxunuş sayı: 4872
