907-ci düzəliş yenə gündəmdə: Vaşinqton Bakıya bu mesajı verir
ABŞ Dövlət Departamentinin Azərbaycanın 907-ci düzəlişlə nəzərdə tutulan məhdudiyyətlərdən azad edilməsinin müddətinin uzadılması ilə bağlı Konqresə bildiriş göndərməsi diqqət çəkən qərarlardandır. Vaşinqtonun bu addımı Bakı ilə münasibətlərin hazırkı mərhələsi və Cənubi Qafqazdakı geosiyasi proseslər fonunda mühüm mesaj kimi qiymətləndirilə bilər.
Bəs ABŞ-nin bu qərarının əsas məqsədi nədir? Bu addım Azərbaycanın regionda artan strateji əhəmiyyətinin və ABŞ-Azərbaycan münasibətlərinin yeni mərhələyə keçdiyinin göstəricisi sayıla bilərmi?
Mövzu ilə bağlı politoloq Aydın Quliyev Crossmedia.az-a bildirib ki, Dövlət Departamentinin Konqresə belə bir müraciət etməsi həm Azərbaycanla münasibətlər baxımından müsbət əlamət, həm də tam təqdir olunası olmayan addımdır. Onun sözlərinə görə, müsbət məqam ondan ibarətdir ki, 907-ci düzəlişdə nəzərdə tutulan məhdudiyyətlərin Azərbaycana tətbiqinin daha bir il dayandırılması ilə bağlı niyyət ortadadır. Baydenin hakimiyyəti dövründə bu məhdudiyyətlərin icrasının müvəqqəti dayandırılması ilə bağlı belə bir addım atılmayıb: “Azərbaycan Əfqanıstanda ABŞ-yə kömək etdiyi müddətdə Amerika administrasiyası 907-ci düzəlişdə nəzərdə tutulan məhdudiyyətlərin Azərbaycana tətbiqini ilbəil təxirə salırdı. Lakin 2021-ci ildə Amerika qoşunlarının Əfqanıstandan çıxarılmasından sonra ABŞ bu məhdudiyyətlərin tətbiqini uzatmaqdan imtina edib. Tramp hakimiyyətə gəldikdən sonra ötən ilin avqustunda verdiyi sözə qismən əməl edərək 907-ci düzəlişin Azərbaycana tətbiqini daha bir il dondurub. O əlavə edib ki, Dövlət Departamentinin hazırkı müraciəti də qarşıdakı bir ildə Azərbaycanın həmin məhdudiyyətləri öz üzərində hiss etməməsi üçün hazırlıq getdiyini göstərir”.
A.Quliyev vurğulayıb ki, əsas narazılıq doğuran məqam 907-ci düzəlişin tamamilə ləğv edilməməsidir. Onun sözlərinə görə, düzəlişin tətbiqi üçün ABŞ tərəfindən 20 ildən çox əvvəl zəruri hesab edilən amillərin hazırda heç biri mövcud deyil: “Ermənistanla müharibə bitib, Ermənistanın təcavüzünə son qoyulub, blokada deyilən bir vəziyyət yoxdur. Ona görə də 907-ci düzəlişin tamamilə ləğv olunması onun ilbəil təxirə salınmasından daha məqbuldur. Azərbaycan tərəfi ABŞ-dən 907-ci düzəlişin tamamilə ləğv olunmasını gözləyir. Tramp administrasiyasının Bayden dövründəki yanaşmanı təkrarlamaq əvəzinə, bu məsələdə köklü və fərqli mövqe nümayiş etdirməsi daha məqsədəuyğun olardı. Dövlət Departamentinin Konqresə son müraciəti müəyyən qədər Tramp administrasiyasının Bayden dövründəki yanaşmanı davam etdirməsi təsiri bağışlayır. Biz Trampdan Bayden sayağı davranış yox, 907-ci düzəlişin tamamilə ləğv olunmasını gözləyirik”.
Nuray Mehtiyeva
19:00 17.08.2026
Oxunuş sayı: 62
