Üç il yerin altında yaşadı, insan əti bişirməyə məcbur edildi
Kolumbiyada 61 yaşlı keçmiş aşpaz Oskar Rosas narkotik karteli tərəfindən üç il ərzində yeraltı tunellərdə əsir saxlanıldığını və insan əti bişirməyə məcbur edildiyini iddia edib.
Crossmedia.az xəbər verir ki, bu barədə Türkiyənin “Son Dakika” nəşri məlumat yayıb.
Rosasın sözlərinə görə, o, Boqotanın cinayətkar qruplaşmaların fəaliyyət göstərdiyi El Bronks bölgəsində Los Sayayines adlı narkotik dəstəsinin əlinə düşüb. Əvvəlcə xüsusi tədbir üçün yemək hazırlamaq təklifi alan keçmiş aşpaz sonradan yeraltı tunellərə aparılıb, döyülüb və oradan çıxmasına icazə verilməyib.
O, insan qalıqlarından yemək hazırlamaqdan imtina etdikdə silahla hədələnib. Ona deyiblər ki, "Ya bişirəcəksən, ya da səni yeyəcəyik".
Rosas üç il ərzində insan əti yeməyə də məcbur edildiyini, tunellərə hər gün meyitlər gətirildiyini iddia edib.
Keçmiş aşpazın sözlərinə görə, intihara cəhd etdikdən sonra dəstə üzvlərindən biri onu küçəyə buraxıb. Hazırda o, Bucaramanga şəhərində reabilitasiya mərkəzi işlədir və 11 ildir narkotikdən uzaq qalmağa çalışır.
Qeyd edək ki, 2016-cı ildə El Bronks bölgəsində keçirilən genişmiqyaslı polis əməliyyatı zamanı təxminən 100 metr uzunluğunda gizli yeraltı tunel aşkarlanıb.
22:54 16.11.2026
Oxunuş sayı: 150