2026-cı ilin Yeni il trendi bəlli oldu: Uşaqlığımızın bəzəkləri qayıdır
2026-cı ildə Yeni il ağaclarının bəzədilməsində retro üslub və nostalji dekor ön plana çıxıb. Minimalist dizayn və eyni rəngli oyuncaqların yerini rəngarəng şüşə kürələr, parıltılı toplar, vintac fiqurlar və əl işləri tutur.
Crossmedia.az xəbər verir ki, bu barədə "Style" nəşri yazıb.
Nəşrin məlumatına görə, bu mövsüm dizaynerlər Yeni il ağacını mükəmməl simmetriya ilə bəzəmək əvəzinə, ona şəxsi xatirələri əks etdirən əşyalar əlavə etməyi tövsiyə edirlər.
Xüsusilə ailədən qalan köhnə oyuncaqlar, əl ilə hazırlanmış bəzəklər, taxta fiqurlar, məxmər lentlər və rəngli şüşə kürələr aktuallıq qazanıb. Bu üslub "Kitschmas" adlandırılır və parlaq rənglərin, fərqli naxışların, hətta bir qədər qarışıq dekorun istifadəsini nəzərdə tutur.
Dizaynerlər həmçinin kağız zəncirlər, qurudulmuş portağal dilimləri, darçın, küknar budaqları və təbii materiallardan hazırlanmış bəzəklərə üstünlük verməyi məsləhət görürlər.
2026-cı ilin əsas tendensiyalarından biri də soyuq ağ işıqlar əvəzinə isti sarı işıq saçan ənənəvi lampaların istifadəsidir.
Mütəxəssislərin fikrincə, bu ilin ən dəbli Yeni il ağacı bahalı və eyni dəstdən olan oyuncaqlarla bəzədilən deyil, ailə tarixini və uşaqlıq xatirələrini əks etdirən ağac olacaq.
21:51 16.11.2026
Oxunuş sayı: 40