60 ildən çox gizli qalan sənəd hərraca çıxarılır – Qiyməti 10 milyon dollar
ABŞ-də irqi ayrı-seçkiliyə qarşı mübarizənin simvoluna çevrilmiş Martin Lüter Kinqin məşhur “Mənim bir arzum var” (I Have a Dream) nitqinin əlyazma variantı hərraca çıxarılacaq. Sənədin 10 milyon dollardan baha qiymətə satılacağı gözlənilir.
Crossmedia.az xəbər verir ki, bu barədə "Reuters" nəşri məlumat yayıb.

Bildirilib ki, yeddi səhifədən ibarət əlyazma 22 yanvar 2027-ci ildə Nyu-Yorkda “Christie's” hərrac evində satışa təqdim olunacaq.

Martin Lüter Kinq bu çıxışını 28 avqust 1963-cü ildə Vaşinqtonda, Linkoln Memorialının qarşısında təxminən 250 min insanın iştirakı ilə keçirilən mitinqdə səsləndirib.

Maraqlı məqam odur ki, çıxışa adını verən məşhur “Mənim bir arzum var” ifadəsi əlyazmada yer almır. Kinq bu sözləri nitq zamanı improvizə edərək söyləyib.

Əlyazma onilliklər ərzində bir siyirmədə saxlanılıb. Sənəd ilk dəfə 1990-cı illərin sonunda tapılsa da, onun tarixi əhəmiyyəti yalnız sonrakı araşdırmalardan sonra müəyyənləşdirilib. 2024-cü ildə yenidən üzə çıxarılan sənəd hazırda Kinqin həmin çıxışının məlum olan yeganə əlyazma son variantı hesab olunur.
22:24 16.11.2026
Oxunuş sayı: 50