Epşteynin ölümündə 6 il sonra üzə çıxan sirr: Boynundakı izlər nəyi göstərir?
ABŞ-də cinsi istismar cinayətlərinə görə həbsdə olan milyarder Ceffri Epşteynin 2019-cu ildəki ölümü ilə bağlı yeni iddia ortaya atılıb. Məhkəmə-tibb eksperti Maykl Friman onun intihar etmədiyini, qətlə yetirildiyini düşünür.
Crossmedia.az xəbər verir ki, bu barədə "BBC" nəşri məlumat yayıb.
Məlumata görə, Friman Nyu-York Məhkəmə-Tibb Ekspertizası İdarəsinin Epşteynin ölümünə dair yarılma dosyesini və fotoşəkillərini araşdırdıqdan sonra belə qənaətə gəlib.
Ekspertin diqqətini xüsusilə Epşteynin boynundakı izlər çəkib. Onun sözlərinə görə, boğulma izinin üzərində dırnaq cızıqlarına bənzər əlamətlər müşahidə olunur.
Friman hesab edir ki, bu, mərhumun arxadan boğulduğunu və özünü xilas etmək üçün boynundakı bağı çıxarmağa çalışdığını göstərə bilər.
O, Epşteynin sol çiynindəki qanaxmanın və üz nahiyəsindəki xəsarətlərin də hücum ehtimalını gücləndirdiyini bildirib.
Frimanın fikrincə, yaralanmalarla meyitin tapıldığı vəziyyət bir-birinə uyğun gəlmir və bu hallar ölümün qətl nəticəsində baş verdiyini düşündürür.
Ekspert araşdırma zamanı Epşteynin meyitini şəxsən müayinə etməyib. O, nəticələrini yarılma sənədləri və fotoşəkillər əsasında hazırlayıb. Dosyeni ona Epşteynin qardaşı Mark Epşteyn təqdim edib. Friman araşdırmasına görə Mark Epşteyndən heç bir ödəniş almadığını və təhlilin müstəqil aparıldığını bildirib.
Qeyd edək ki, Nyu-Yorkun Məhkəmə-Tibb Ekspertizası İdarəsi 2019-cu ildə Epşteynin ölümünü intihar kimi qiymətləndirib. Həmin dövrdə idarənin rəhbəri olan Barbara Sampson da rəsmi nəticənin arxasında olduğunu bildirib.
Ceffri Epşteyn 10 avqust 2019-cu ildə Nyu-Yorkdakı Metropolitan həbsxanasında ölü tapılıb. O, azyaşlı qızların cinsi istismarı şəbəkəsini təşkil etməkdə ittiham olunurdu və məhkəməsini gözləyirdi.
23:30 16.11.2026
Oxunuş sayı: 151