Azərbaycanın Avropa dövlətləri ilə viza rejimini sadələşdirməsi gözlənilir
Azərbaycan və Avropa İttifaqı yeni ikitərəfli saziş üzrə danışıqları yenidən bərpa edib. Tərəflər artıq “Tərəfdaşlığın prioritetləri” adlı sənədin mətnini ilkin olaraq razılaşdırıblar və bununla da uzunmüddətli əməkdaşlıq çərçivəsində növbəti mərhələyə keçid edilib.
Bu barədə Avropa İttifaqının Azərbaycandakı səfirliyi “X” sosial şəbəkəsində məlumat yayıb. Bildirilib ki, danışıqların bərpası Bakı-Brüssel münasibətlərində yeni dinamikanın formalaşmasına və əməkdaşlığın daha da dərinləşməsinə xidmət edəcək.
Maraqlıdır danışıqların bərpası gələcəyə nə vəd edir?
Məsələ ilə bağlı keçmiş xarici işlər naziri Elmar Məmmədyarov Crossmedia.az-la öz fikirlərini bölüşüb: "Azərbaycanla Avropa İttifaqı və bir sıra Avropa ölkələri arasında strateji əməkdaşlıq əlaqələri mövcuddur. Bu münasibətlər getdikcə daha da inkişaf etdirilir. Xüsusilə enerji sahəsi olmaqla yanaşı, iqtisadiyyat, ticarət, təhsil və digər istiqamətlərdə də əməkdaşlıq genişlənməkdədir. Azərbaycanla Avropa İttifaqı arasında vaxtilə viza rejiminin sadələşdirilməsi ilə bağlı müzakirələr aparılmış, bəzi Avropa ölkələri ilə isə bu istiqamətdə ikitərəfli sazişlər imzalanmışdır. Bu baxımdan, gələcəkdə Azərbaycanın bir çox Avropa dövləti ilə viza rejiminin sadələşdirilməsi və ya qarşılıqlı viza əlaqələrinin genişləndirilməsi istiqamətində daha fəal addımlar atması məqsədəuyğun olardı".
Elmir Heydərli
14:44 04.06.2026
Oxunuş sayı: 61
