Bakının "gözünə" çevriləcək "Sovetski"dən REPORTAJ: " Unudulmaz günləri, meyvəli heyətləri...
"Sovetski"dəyik. Xalq artisti Eyyub Yaqubovun unudulmaz günləri, meyvəli heyətləri ilə haqqında danışdığı "Sovetski"də. Artıq uzun müddətdir ki, burada yenidənqurma işləri davam edir.
Yasamal rayonu Mizə Fətəli Axundzadə küçəsi ilə Lev Tolstoy küçəsinin kəsişməsi, Təzəpir məscidinin ətrafında aparılan söküntü işləri ilə tanış oluruq. Toz - tormaq olduğuna görə, ətrafda insan, demək olar, yoxdur. Bəziləri isə pəncərədən baxırlar.
Bizi buraya gətirən həyata keçirilən işlərə olan marağımız oldu. Yenidənqurma işləri 2024-cü ildən bəri davam edir. Ümumiyyətlə, bu kimi söküntü- tikinti işləri təkcə "Sovetski" üçün xarakterik deyil. Ölkənin və paytaxt Bakının bir çox yerlərində də müntəzəm və ardıcıl olaraq oxşar addımlar atılılır.
Bu tədbirlər təbii ki, birbaşa ölkə rəhbəri İlham Əliyevin tapşırığı və nəzarəti altında həyata keçirilir. Prezidentin təsdiq elədiyi Bakı şəhərinin baş planına əsasən artıq şəhərimizdə abadlıq-quruculuq işləri start götürmüş və sürətlə davam etdirilməkdədir. Yeni plana əsasən Bakı şəhərində istismar müddətini başa vurmuş, qəzalı binalar sökülərək yerində yeni, gözəl binalar, parklar inşa edilməkdədir. Qeyd edim ki, artıq söküntü işləri başlamış və mərhələli şəkildə aparılmaqdadır. Hazırda bu plan Bakının Sovetski adlanan ərazisində həyata keçirilir.
İlkin mərhələ olaraq Nəriman Nərimanov prospektini əhatə edən söküntü prosesində köhnə, istismar müddətini bitirmiş evlər sökülərək yerində abad yaşıllıq salınmış və bu gün xalqımız bu yaşıllıqlar əhatəsində olan parkdan istirahət məqsədilə istifadə edirlər. Əlbəttə, bu cür abadlıq işləri bir daha ölkə başçısının xalqımıza olan diqqətinin bariz sübutudur.
Bir neçə il əvvəl Balaxanı, Bibiheybət, Qala kimi qəsəbələlərdə ciddi işlər görüldü. Görünür, indi də növbə "Sovetski"yə çatıb.
Ərazidə gəzir, bir- birimizlə danışa- danışa fotolar çəkirik. "Sovetski"də çoxdandır olmurduq. Bəlkə də, sonuncu dəfə bu işlər başlamazdan əvvəl əraziyə yolumuz düşmüşdü. İnsanları da tanımırıq. Hərçənd tanısaq nə olacaq? Onsuz da dediyim kimi, bir tərəfdən isti əlindən, digər tərəfdən isə toz - torpağa görə insanlar evlərindədirlər. Odur ki, istər- istəməz darıxırıq. Təsəllini isə bir - birimizdə tapırıq. Hərdən danışırıq ki, vaxt keçsin.
Pilləkənlar dağılmış blokun qarşısında bir baba ilə nəvəsini görürük. Yaşlı adama nəvəsinə "A bala, get qonşu dükandan qutu götür, evdəki bəzi şeyləri yığaq, toz - torpaq olur". İnsanlar da artıq mövcud duruma adaptasiya olunublar.
Dar küçələr, dalan yollarla gəzirik. Dağıntı- söküntü işləri yolları daha da keçilməz edir. Buna baxmayaraq, işimizi davam etdiririk.
Burada həm həyət, həm də bina evləri var. Yəqin ki, gələcəkdə yerlərində yeni binalar tikiləcək, qəsəbənin siması tamamilə dəyişəcək. Bu fikirlərlə addımlayırıq.
Kiçik dükkanın bir küncündə 60-65 yaşlarında iki kişi nərd oynayır. Onlara yaxınlaşırıq. Görülən işlər barədə soruşuruq. Kişi zərləri ovucunda sonuncu dəfə fırladıb atıb danışmağa başlayır:
- Oğul, mənim atam da, mən də burada böyümüşəm. Tale elə gətirdi ki, oğluma da, nəvəmə də burada böyümək nəsib oldu. Təbii, buranın sökülməyi məni üzür. Çünki bu gördüyün hər bir divarda bir xatirəm, izim var. Lakin nəzərə almalıyıq ki, artıq illər keçir, bu evlərində istismar müddəti başa çatır və sökülməlidir. Bir zamanlar şəhərə gözəllik qatan bu evlər artıq qəzalı vəziyyətdədir. Buna görə də bunların sökülməsi və yerində daha gözəl evlər, parklar salınması gərəkdir. Bir sözlə, sökülən divarlara baxıb üzülsəm də, bir yandan da sevinirəm ki, bizə diqqət və qayğı göstərilir, daha da yaxşılaşdırılır şəraitimiz".
- Bəs hazırda göstərilən qayğıdan məmnunsunuzmu?
Kişi fikrini oyundan yayındırmadan danışır:
- Oğul, əlbəttə, hə. Uca Allahdan ölkə başçımıza möhkəm cansağlığı arzulayıram. Bu gün onun başçılığı altında biz qalib və güclü ölkəyik. Diqqətdən isə, əlbəttə, məmnunam. Artıq evim ölçülüb, qiymətləndirilib, hətta qalmağımız üçün gördüyün bu qonşu evlər daxil olmaqla ilkin olaraq kirayə üçün ödəniş ayrılıb. Bircə gözləyirəm ki, deyilən kimi çıxım. Oğul, bu şərait də bizlər üçün yaradılır ki, rahat şəraitdə yaşayaq, dincələk. Buna görə də hazırki vəziyyəti çox müsbət və xoş qarşılayıram.
Üzbəüz oturduğu qonşusa da həmsöhbətimin fikrinə dəstək verir.
"Oyunçu aparsın" deyib onlarla sağollaşırıq. Bir neçə addım atmışdıq ki, onlardan birinin- bayaqdan bəri mənimlə daşınan kişinin sevincək dediyi "şeş qoşa" sözünü eşidirik. Bir - birimizə baxıb təbəssüm edirik. Deyəsən, ayağımız düşərli oldu.
Hazırda söküntü işlərinin Təzəpir məscidinin ətrafında başlayaraq Nizami metrosunun ətrafı və sonrakı mərhələdə Mirzağa Əliyev küçəsi istiqamətində aparılması nəzərdə tutulub. Yerində isə yeni layihəyə əsasən insanların asudə vaxtlarını səmərəli keçirməsi üçün yaşıl parklar və dövrün tələblərinə, əhali sayının tənziminə uyğun olaraq evlərin salınması nəzərdə tutulur.
Gəzə - gəzə oxuyuruq:
"Bakı, Bakı səslənir hər yerdə
Bakı sən gözəlsən əzəldən
Bakı hər an gözləyir bizləri
Gözəllər şəhəri şəhərlər gözəli".
Zəng gəlir. Dostlarımız bizim harada olduğumuzu soruşur, sonra da çay içməyə çağırırlar. Onların təkidi ilə Balaxanıya gedirik. Deyirlər ki, orada mühit tam başqadır: insan özünü başqa mühitdə hiss edir. Razılaşırıq və əlavə edirik: Uzağı gələn il, bəlkə də, bir neçə ilə "Sovetski"də çay içərik. Nəyi nəzərdı tutduğumuzu, bəlkə də, başa düşmürlər. Amma biz bilirik: "Sovetski"nin Bakının ən gözəl guşələrindən birinə çevrilməsinə az qalıb...
Elmir Heydərli
13:39 15.08.2025
Oxunuş sayı: 17762
