Litva baş nazirinin doktorluq dissertasiyası ilə bağlı araşdırma başlanıb
Litvanın Baş naziri Mindauqas Sinkeviçyusun doktorluq dissertasiyasının hazırlanması zamanı akademik etika qaydalarının pozulub-pozulmadığı araşdırılır.
Crossmedia.az xəbər verir ki, bu barədə ˝LRT˝ məlumat yayıb.
İdarəetmə və İqtisadiyyat üzrə ISM Universitetinin Etika Komitəsi Akademik Etika və Prosedurlar üzrə Ombudsman İdarəsi tərəfindən göndərilən şikayətə baxmaq qərarına gəlib. Şikayətdə Sinkeviçyusun doktorluq dissertasiyasının hazırlanması zamanı mümkün pozuntulardan bəhs olunur.
Universitetdən bildirilib ki, tələbə və məzunlarla bağlı akademik etika məsələləri şəxsin vəzifəsindən və ictimai statusundan asılı olmayaraq eyni qaydalar əsasında araşdırılır.
Toplanmış materiallar təhlil edildikdən və prosesdə maraqlı tərəflər dinlənildikdən sonra qərar qəbul ediləcək. Mövcud qaydalara əsasən, yay tətili müddəti nəzərə alınmadan araşdırma 30 təqvim günü ərzində başa çatdırılmalıdır. ISM araşdırmanın nəticələrini sentyabrın sonuna qədər açıqlamağı planlaşdırır.
Baş nazirin doktorluq dissertasiyasında mümkün plagiatla bağlı müzakirələr son həftələrdə ictimaiyyət və siyasi müxalifətin tənqidlərindən sonra daha da intensivləşib. Sinkeviçyus isə işinin akademik normalara uyğun hazırlandığını dəfələrlə bildirib və plagiat ittihamlarını rədd edib.
Sinkeviçyus 2009-cu ildə ISM Universitetində marketinq və menecment üzrə magistr dərəcəsi alıb, 2015-ci ildə isə həmin universitetdə doktorluq dissertasiyasını müdafiə edib.
18:40 01.08.2026
Oxunuş sayı: 54
