Volqoqrad vilayətində yanacaq satışına yenidən məhdudiyyət qoyulub
Rusiyanın Volqoqrad vilayətində fəaliyyət göstərən bəzi yanacaqdoldurma məntəqələrində artan tələbat səbəbindən yanacaq satışına yenidən məhdudiyyət tətbiq edilib.
Crossmedia.az xəbər verir ki, Volqoqrad vilayətinin Sənaye Siyasəti, Ticarət və Yanacaq-Energetika Komitəsi bu barədə məlumat yayıb.
Bildirilib ki, tələbatın kəskin artması ilə əlaqədar "LUKOIL" və "Qazprom" şəbəkələrinə məxsus yanacaqdoldurma məntəqələrində müvəqqəti məhdudiyyətlər qüvvəyə minib.
Məlumata görə, bir əməliyyat üzrə maksimum 40 litr benzin satılır. Bundan əlavə, "LUKOIL" məntəqələrində dizel yanacağının satışı da məhdudlaşdırılıb. Şəhərdaxili məntəqələrdə bir avtomobilə maksimum 60 litr, magistral yollar üzərində yerləşən məntəqələrdə isə 200 litr dizel buraxılır.
Komitə qeyd edib ki, "Qazprom" şəbəkəsinə məxsus yanacaqdoldurma məntəqələrində dizel yanacağının satışına hər hansı məhdudiyyət tətbiq olunmayıb.
17:23 01.08.2026
Oxunuş sayı: 52
