Azərbaycan regiondakı hərbi-siyasi balansın Ermənistanın xeyrinə dəyişməsinə razı olmayacaq - RƏY
Ermənistanın Amerika Birləşmiş Ştatlar ilə hərbi-texniki əməkdaşlığı dərinləşdirmək istiqamətindəki fəallığı və ölkənin Vaşinqtondakı səfiri Narek Mkrtçyanın Amerika müdafiə texnologiyalarını əldə etmək imkanları barədə verdiyi bəyanat Cənubi Qafqazda təhlükəsizlik balansını yenidən gündəmə gətirib. İrəvanın bu addımlarının regiondakı qüvvələr nisbətinə təsiri və geosiyasi nəticələri barədə politoloq, fəlsəfə doktoru Şölət Zeynalov Crossmedia.az-a açıqlama verib.
Ekspert bildirib ki, Ermənistanın bu cəhdləri regiondakı real hərbi-siyasi reallıqları dəyişməyə kifayət etmir:
"Ermənistan səfirinin bu açıqlaması onu göstərir ki, İrəvan tərəfi hələ də Cənubi Qafqazda güclər balansını öz xeyrinə dəyişə biləcəyinə ümid edir. Lakin mənim qənaətimcə, bu, artıq mümkün deyil. Çünki Azərbaycanın İkinci Qarabağ müharibəsində qazandığı Zəfər və keçirdiyi uğurlu antiterror əməliyyatı göstərdi ki, ölkəmizlə müqayisədə Ermənistan ordusu həddindən artıq zəifdir. Təbii ki, Azərbaycan heç vaxt müharibə tərəfdarı olmayıb və məsələlərin sülh yolu ilə həllinə çalışıb. Lakin torpaqlarımızın azad olunması uğrunda uzun illər aparılan danışıqlar nəticə vermədiyi üçün prosesin hansı hərbi-siyasi yekunlaşma ilə bitdiyi hər kəsə məlumdur.
Narek Mkrtçyanın Birləşmiş Ştatlardan müdafiə texnologiyalarının əldə olunması imkanları ilə bağlı bəyanatı, şübhəsiz ki, Cənubi Qafqazdakı təhlükəsizlik balansına qarşı bir təhdiddir. Lakin bu təhdidin real müstəviyə keçməsi və tətbiq olunması üçün uzun müddət lazımdır. Nəzərə almaq lazımdır ki, ABŞ-nin regiondakı ən böyük səfirliyi məhz Ermənistanda yerləşir. Bu, Vaşinqtonla İrəvan arasında isti münasibətlərin göstəricisidir, eyni zamanda ABŞ-nin Ermənistana hərbi dəstəyi təkcə Azərbaycana qarşı yönəlməyib. Bütün bunlara baxmayaraq, Azərbaycan hər zaman Cənubi Qafqazda sülhün və təhlükəsizliyin bərqərar olunmasına öz töhfəsini verir. Təbii ki, ölkəmiz regiondakı mövcud hərbi-siyasi balansın Ermənistanın xeyrinə dəyişməsinə qətiyyən razı ola bilməz. Məsələnin digər tərəfi odur ki, bu balansın pozulmasında nə Rusiya, nə də İran maraqlıdır. Çünki Ermənistana verilən bu cür hərbi dəstəyin gələcəkdə İrana qarşı da istifadə olunma riski var. Hesab edirəm ki, hazırda Cənubi Qafqazda formalaşan mövcud balans regionun ana güclərini tam qane edir".
Ş.Zeynalov vurğulayıb ki, İrəvanın kənar qüvvələrin dəstəyi ilə silahlanması Moskva və Tehranın müqaviməti ilə üzləşəcək:
"Ermənistanın yeni hərbi texnologiyalar almaq cəhdi, təbii ki, ilk növbədə Rusiyanı qıcıqlandıracaq. Çünki Moskva Cənubi Qafqazda öz mövqelərini qətiyyən itirmək istəmir. Eyni zamanda İranın da buna reaksiyası heç də müsbət olmayacaq. Ola bilər ki, Tehran müəyyən məqamda zahiri susqunluq nümayiş etdirsin, lakin gələcək prosesləri nəzarətdə saxlaya bilmədikləri üçün onların mövqeyi mənfi olaraq qalacaq. Nəzərə almaq lazımdır ki, hələ də KTMT-nin tərkibində yer alan bir dövlətin Moskvanın razılığı olmadan kənar qüvvələrin dəstəyi ilə silahlanması gələcəkdə regionda daha yeni başağrılarının və gərginliklərin yaranmasına səbəb ola bilər. Hesab edirəm ki, mövcud vəziyyət fonunda bu proseslər gərginliyi pik nöqtəyə çatdıra bilər".
Fatimə Cabbarlı
18:30 21.07.2026
Oxunuş sayı: 71
