Xarici xəbərlər
Lula da Silva: Çin və ABŞ-dən asılı qalmaq istəmirik
Braziliya ABŞ və Çindən iqtisadi asılılıqda qalmaq istəmir və bu ölkələrlə bərabər səviyyəyə çatmağı hədəfləyir.
Crossmedia.az xəbər verir ki, Braziliya Prezidenti Lula da Silva bu barədə açıqlama verib.
Prezident bildirib ki, Braziliya ABŞ və Çinlə bərabər səviyyədə olmaq, hətta onları geridə qoymaq istəyir.
“Biz onlarla bərabər səviyyədə olmaq və ya onları geridə qoymaq istəyirik. Amma heç bir halda onlardan aşağı olmaq istəmirik. Bunun üçün kifayət qədər insan resurslarımız var. Ölkəmizi güclü iqtisadi gücə çevirmək istəyirik”, – deyə Lula da Silva bildirib.
O, Braziliyanın mövcud imkanlarını digər ölkələrlə müqayisə edərkən Çinin əhali və ərazi baxımından daha böyük olduğunu vurğulayıb. Prezident Çində müxalifət qəzetlərinin, müstəqil həmkarlar ittifaqlarının və müxalif siyasi partiyaların olmadığını qeyd edərək, Braziliyanın özünü oxşar ölkələrlə müqayisə etməli olduğunu deyib.
Lula da Silva, həmçinin keçmiş prezident Jair Bolsonarunun iqtisadi artıma nail ola bilmədiyini, hakimiyyətə qayıtdıqdan sonra isə ölkə iqtisadiyyatının yenidən böyüməyə başladığını bildirib.
22:20 06.11.2026
Oxunuş sayı: 63
