Xarici xəbərlər
Si Cinpinin hakimiyyəti dövründə 628 min Çin rəsmisi cinayət məsuliyyətinə cəlb edilib
Çin Prezidenti Si Cinpinin hakimiyyətdə olduğu dövrdə təxminən 628 min Kommunist Partiyası funksioneri cinayət məsuliyyətinə cəlb olunub.
Crossmedia.az xəbər verir ki, bu barədə “Financial Times” (FT) məlumat yayıb.
“Claremont McKenna” Kollecinin dövlət idarəçiliyi üzrə professoru Minxin Peyin qiymətləndirməsinə görə, Si Cinpinin hakimiyyətinin 13 ilindən statistik məlumatların mövcud olduğu 11 ili ərzində təxminən 628 min partiya rəsmisi cinayət məsuliyyətinə cəlb edilib və ehtimal ki, həbs cəzası alıb.
Qeyd edilib ki, Çində bu miqyasda partiya nümayəndələrinin məsuliyyətə cəlb edilməsi Mao Tszedunun hakimiyyətindən bəri müşahidə olunmayıb.
FT-nin yazdığına görə, Si Cinpin hakimiyyətdə qaldıqca partiya daxilində aparılan təmizləmələrin miqyası da genişlənir.
Peyin qiymətləndirməsinə əsasən, bu proses Çin Kommunist Partiyasının tarixində ən genişmiqyaslı təmizləmə kampaniyalarından biridir.
22:37 06.11.2026
Oxunuş sayı: 59
