Ukrayna ABŞ-nin hərbi yardımının təxminən 43%-ini ala bilməyib
2026-cı ilin avqust ayına olan məlumata əsasən, Ukrayna 2022-ci ildən bəri "Ukraine Security Assistance Initiative" (USAI) proqramı çərçivəsində ayrılmış vəsaitin yalnız 57,3%-i həcmində silah və hərbi xidmət əldə edib.
Crossmedia.az xəbər verir ki, bu barədə ABŞ Konqresinin Tədqiqat Xidmətinin (CRS) 2026-cı il avqustun 31-də yenilənmiş hesabatında bildirilir.
USAI proqramı üzrə ümumilikdə 33,5 milyard dollar ayrılıb. Beləliklə, faktiki olaraq çatdırılan silah və xidmətlərin dəyəri təxminən 19,2 milyard dollar təşkil edib, qalan 42,7% və ya təxminən 14,3 milyard dollar isə hələ ki çatdırılmış kimi qeydə alınmayıb.
Hesabatda həmçinin qeyd olunur ki, 2022-ci ilin fevralından 2026-cı ilin iyununa qədər ABŞ Ukraynaya 68,2 milyard dollardan çox hərbi yardım göstərməyi öhdəsinə götürüb. Bununla belə, faktiki ötürülən yardımın ümumi dəyəri daha aşağı ola bilər və onun dəqiq həcmi ictimaiyyətə açıqlanmır.
Amerikalı nəzarət orqanlarının məlumatına görə, Konqres 2024-cü ilin aprelindən bəri Ukraynanı dəstəkləmək üçün əhəmiyyətli dərəcədə yeni maliyyə ayırmayıb.
Donald Tramp administrasiyası dövründə hərbi yardımla bağlı yeni öhdəliklərin həcmi 2022–2024-cü illərlə müqayisədə azalıb, lakin əvvəllər qəbul edilmiş qərarlar üzrə tədarüklər davam etdirilib.
Bundan əlavə, hesabatda vurğulanır ki, 2026-cı ilin iyun ayına olan vəziyyətə görə, NATO müttəfiqləri Ukrayna üçün ABŞ silahlarının alınmasını nəzərdə tutan PURL proqramı çərçivəsində təxminən 6,3 milyard dollar ayrıldığını elan ediblər.
22:01 06.11.2026
Oxunuş sayı: 51
