Lavrov azərbaycanlı həmkarı ilə görüşdə hansı mesajları verdi?- Məmmədyarov açıqladı
Rusiya xarici işlər naziri Sergey Lavrovun 2022-ci ildə imzalanmış Müttəfiqlik Qarşılıqlı Fəaliyyəti haqqında Moskva Bəyannaməsinin potensialının tam açılmasına doğru irəlilədiklərini bəyan etməsi Azərbaycan-Rusiya münasibətlərinin strateji gündəliyinin yenidən diqqət mərkəzinə gəldiyini göstərir. İkitərəfli əməkdaşlıqla yanaşı, Cənubi Qafqazdakı vəziyyət və "3+3" regional əməkdaşlıq platforması ilə bağlı müzakirələrin də aparılması bu görüşün regional geosiyasi əhəmiyyətini artırır.
Keçmiş xarici işlər naziri Elmar Məmmədyarov Crossmedia.az-a açıqlamasında bildirib ki, Azərbaycanın xarici işlər nazirinin Rusiyaya səfəri və Sergey Lavrovla keçirilən görüş iki ölkə arasında münasibətlərin normallaşması baxımından mühüm siyasi əhəmiyyət daşıyır:
"Rusiya ilə Azərbaycan arasında son illərdə münasibətlər əvvəlki səviyyədə deyildi. Lakin xarici işlər nazirlərinin son görüşü və verilən bəyanatlar göstərir ki, tərəflər münasibətlərin inkişafında maraqlıdır".
Ekspertin sözlərinə görə, Rusiya da artıq "3+3" regional əməkdaşlıq platformasının əhəmiyyətini daha yaxşı anlayır:
"Sergey Lavrovun səsləndirdiyi fikirlər ilk növbədə siyasi mesaj kimi qiymətləndirilməlidir. Bu, regionda əməkdaşlığın genişləndirilməsi və '3+3' platformasının daha fəal işləməsinə dəstək ifadə edir".
E.Məmmədyarov qeyd edib ki, siyasi dialoqla yanaşı, iqtisadi əməkdaşlığın genişləndirilməsi də gündəmdədir:
"Aprel ayında Rusiya Baş nazirinin müavini Aleksey Overçuk ilə Azərbaycanın Baş nazirinin müavini Şahin Mustafayev arasında keçirilən görüş də iqtisadi əməkdaşlığın inkişafı baxımından mühüm addım idi. Bu istiqamətdə əldə olunan razılaşmaların davam etdirilməsi vacibdir".
O, vurğulayıb ki, nəqliyyat layihələrinin inkişafı Azərbaycan-Rusiya münasibətlərində əsas prioritetlərdən biri olaraq qalır:
"Xüsusilə Şimal-Cənub Beynəlxalq Nəqliyyat Dəhlizi çərçivəsində İran, Azərbaycan və Rusiya arasında nəqliyyat əlaqələrinin daha da gücləndirilməsi həm regional əməkdaşlığa, həm də iqtisadi münasibətlərin inkişafına mühüm töhfə verə bilər".
Nigar Xəlilli
15:30 20.07.2026
Oxunuş sayı: 63
