Ərəb ölkələri ABŞ-nin hərbi planlarına qarşı birləşir
Ərəb Körfəzi ölkələri İranla bağlı mümkün hərbi ssenarilər fonunda ABŞ administrasiyasına qarşı gizli diplomatik fəaliyyət göstərir.
Crossmedia.az xəbər verir ki, bu barədə "The Wall Street Journal" nəşri məlumat yayıb.
Nəşrin yazdığına görə, Səudiyyə Ərəbistanı, Oman və Qətər ABŞ-nin Tehrana yönəlik sərt xəbərdarlıqlarından sonra Donald Trump administrasiyasına qarşı pərdəarxası lobbiçilik aparıblar.
Ərəb Körfəzi rəsmilərinin bildirdiyinə görə, bu ölkələr İran rejiminin devrilməsinə yönəlmiş mümkün hərbi cəhdlərin qlobal neft bazarlarını sarsıdacağından və bunun nəticə etibarilə ABŞ iqtisadiyyatına ciddi zərər vuracağından ehtiyat edirlər. Xüsusilə vurğulanır ki, İranın hədəf alınması Hörmüz boğazından keçən neft tanker daşımalarını poza bilər.
Qeyd edilir ki, dünya üzrə neft daşımalarının təxminən beşdə biri məhz Hörmüz boğazı vasitəsilə həyata keçirilir. Bu marşrutda baş verə biləcək hər hansı hərbi gərginlik qlobal enerji bazarlarında ciddi qiymət artımlarına səbəb ola bilər.
Məlumata əsasən, Səudiyyə Ərəbistanı rəsmiləri Tehrana mümkün münaqişədə iştirak etməyəcəkləri və ABŞ-nin hava zərbələri üçün öz hava məkanlarından istifadəyə icazə verməyəcəkləri ilə bağlı təminat veriblər. Məqsəd ABŞ-nin hərbi addımlarından uzaq durmaq və regionda genişmiqyaslı müharibənin qarşısını almaqdır.
18:28 15.01.2026
Oxunuş sayı: 1345
