Los-Ancelesdə İran əleyhinə aksiya qanla bitib
ABŞ-nin Los-Anceles şəhərində İran hökumətinə qarşı keçirilən etiraz aksiyası zamanı insident baş verib.
Crossmedia.az bu barədə “Los Angeles Times” nəşrinə istinadən xəbər verir.
Etirazların davam etdiyi ərazidə yük maşını nümayişçilərin toplaşdığı izdihama daxil olub, nəticədə bir neçə nəfər xəsarət alıb.
Hadisədən sonra yük maşınının sürücüsü polis əməkdaşları tərəfindən saxlanılıb. Nəşrin məlumatına görə, hüquq-mühafizə orqanları baş verənləri terror aktı kimi qiymətləndirmir və hadisə ilə bağlı araşdırmalar davam etdirilir.
İnsidentlə bağlı diqqət çəkən məqamlardan biri yük maşınının üzərində yazılan siyasi şüarlar olub. Avtomobilin üzərində fars dilində “Buşehrdən Kermanşaha qədər” ifadəsi, eləcə də ingilis dilində “Nə şah, nə də rejim; ABŞ: 1953-cü il təkrarlama; Mollaya yox!” kimi şüarlar yer alıb.
Qeyd edək ki, “ABŞ: 1953-cü il təkrarlama” ifadəsi 1953-cü ildə ABŞ-nin İranda demokratik yolla seçilmiş baş nazir Məhəmməd Mosəddiqin devrilməsində roluna işarə kimi şərh olunur.
Hazırda hadisənin başvermə səbəbləri və sürücünün aksiyaya qəsdən müdaxilə edib-etmədiyi araşdırılır.
13:19 12.01.2026
Oxunuş sayı: 1223
