Qazaxıstan və Azərbaycan regionda sabitlik, enerji təhlükəsizliyi və nəqliyyat əlaqələrinin əsas dayaqlarından sayılır - Deputat
Azərbaycan Prezidenti İlham Əliyevin Qazaxıstanın regional güc kimi möhkəmlənməsini açıq şəkildə dəstəkləməsi, iki ölkə arasında münasibətlərin artıq adi tərəfdaşlıq çərçivəsindən çıxaraq strateji müttəfiqlik müstəvisinə keçdiyini göstərir. Bakı və Astana bu gün həm siyasi, həm iqtisadi, həm də geostrateji baxımdan bir-birini tamamlayan iki əsas türk dövləti kimi çıxış edir. Regionda sabitlik və uzunmüddətli inkişafın təmin olunması, enerji təhlükəsizliyi və yeni nəqliyyat marşrutlarının qurulması kimi məsələlərdə hər iki ölkənin mövqeyi üst-üstə düşür. Bu əməkdaşlıq yalnız iqtisadi layihələrlə məhdudlaşmır – burada həm türk dünyasının inteqrasiyası, həm də beynəlxalq arenada ortaq mövqedən çıxış etmək konsepsiyası dayanır. Qazaxıstanın güclənməsi bütövlükdə türk coğrafiyasının siyasi çəkisini artırır, Azərbaycanın isə bu prosesdə fəal dəstək göstərməsi regional liderlik yanaşmasının təzahürü kimi qiymətləndirilir. Məhz buna görə də iki ölkə arasındakı əlaqələr təkcə razılaşmalar və protokollarla yox, qarşılıqlı etimada və strateji viziona söykənir.
Mövzu ilə bağlı Milli Məclisin deputatı Aydın Hüseynov Crossmedia.az-a açıqlama verib: “Prezident İlham Əliyevin “Qazaxıstanın potensialının möhkəmləndirilməsi kursunu tam dəstəkləyirik” bəyanatı Azərbaycan-Qazaxıstan münasibətlərinin strateji xarakterini bir daha təsdiqləyir. Bu sözlər sadəcə diplomatik jest deyil, türk dünyasında dərin mənəvi və siyasi yaxınlığın, ortaq inkişaf strategiyasının ifadəsidir. Qazaxıstan və Azərbaycan bu gün regionda sabitlik, enerji təhlükəsizliyi və nəqliyyat əlaqələrinin əsas dayaqlarından sayılır. Qazaxıstanın iqtisadi gücünün artması, onun beynəlxalq platformalarda mövqeyinin möhkəmlənməsi türk dünyasının ümumi potensialını da artırır. Azərbaycan bu prosesi özünün strateji maraqları ilə uzlaşdıraraq, qarşılıqlı əməkdaşlıq üçün yeni imkanlar yaradır. Hər iki ölkə Xəzər hövzəsində enerji layihələri, nəqliyyat dəhlizləri və tranzit marşrutlarının inkişafında mühüm tərəfdaşlıq qurub. “Orta Dəhliz” və “Zəngəzur dəhlizi” kimi layihələr bu əməkdaşlığın təkcə regional deyil, qlobal əhəmiyyət daşıdığını göstərir”.
Deputat həmçinin bildirib: “Azərbaycan-Qazaxıstan münasibətləri enerji sahəsi ilə məhdudlaşmır. Kənd təsərrüfatı, logistika, rəqəmsal iqtisadiyyat, təhsil və mədəniyyət kimi sahələrdə birgə təşəbbüslər qarşılıqlı inkişaf üçün yeni üfüqlər açır. Xüsusilə də Xəzər dənizi vasitəsilə yük daşımalarının artırılması və vahid tranzit sisteminin formalaşdırılması hər iki ölkəyə iqtisadi üstünlüklər qazandıracaq. Bu münasibətlərin dərinləşməsi həm Azərbaycan, həm də Qazaxıstan üçün yalnız iqtisadi mənfəət deyil, eyni zamanda siyasi sabitlik və regional nüfuzun artması deməkdir. Qazaxıstanın möhkəmlənməsi türk coğrafiyasında balansın və qarşılıqlı etimadın qorunmasına xidmət edir. Azərbaycan isə bu prosesdə etibarlı müttəfiq və birləşdirici güc kimi çıxış edir”.
Ayhan
18:37 22.10.2025
Oxunuş sayı: 1779
