Bu səfər Qazaxıstanın Orta Asiyada, Azərbaycanın isə Cənubi Qafqazda artan nüfuzunun göstəricisidir - Deputat
Qazaxıstan Prezidenti Kasım Jomart Tokayevin “Azərbaycan bizim üçün müstəsna ölkə, qardaş dövlətdir” fikri, iki ölkə arasında münasibətlərin səmimi dostluq, qarşılıqlı etimad və strateji əməkdaşlıq üzərində qurulduğunu bir daha təsdiqlədi. Prezident İlham Əliyevin Qazaxıstana dövlət səfəri bu əlaqələrin daha da dərinləşməsi, yeni mərhələyə qədəm qoyması baxımından mühüm əhəmiyyət daşıyır. Bu səfər zamanı əldə edilən razılaşmalar və imzalanan sənədlər, Azərbaycan–Qazaxıstan münasibətlərinin təkcə siyasi deyil, həm də iqtisadi, mədəni və humanitar sahələrdə inkişafının göstəricisidir.
Mövzu ilə bağlı Crossmedia.az-a açıqlamasında deputat Ülviyyə Həmzəyeva bildirib ki, Azərbaycan və Qazaxıstan münasibətləri ortaq tarix, mədəniyyət və dəyərlər üzərində qurulan sarsılmaz qardaşlıq və strateji əməkdaşlıq nümunəsidir: “Qazaxıstan Prezidenti Kasım Jomart Tokayevin “Azərbaycan bizim üçün müstəsna ölkə, qardaş dövlətdir” fikri iki ölkə arasında münasibətlərin səmimi dostluq və strateji əməkdaşlıq ruhunda inkişaf etdiyini bir daha təsdiqlədi. Prezident İlham Əliyevin Qazaxıstana dövlət səfəri zamanı əldə edilən razılaşmalar, imzalanan sənədlər və tərəflərin qarşılıqlı etimadı bu münasibətləri yeni mərhələyə daşıyır.
Bu baxımdan “Azərbaycan Qazaxıstan üçün müstəsna ölkə, qardaş dövlətdir” ifadəsi sadəcə diplomatik kompliment deyil, dərin tarixi və mədəni bağların təbii ifadəsidir. Azərbaycan və Qazaxıstan eyni kökdən gələn, ortaq dilə, inanca və dəyərlərə sahib iki qardaş dövlətdir. Prezident Tokayevin sözləri bu münasibətlərin mənəvi və strateji mahiyyətini göstərir. Hər iki ölkənin liderləri, Prezident İlham Əliyev və Prezident Tokayev bu yaxınlığı yeni dövrün çağırışlarına uyğun şəkildə möhkəmləndirirlər. Onların qarşılıqlı hörmət və etimad üzərində qurduğu əlaqə təkcə ikitərəfli münasibətləri deyil, bütövlükdə türk dünyasının birliyini gücləndirir”.
Deputat iki ölkə arasındaki tərəfdaşlıqdan danışıb: “Bu səfər iki ölkə münasibətlərində strateji tərəfdaşlığın yeni mərhələsini başlatdı. Astana görüşü təkcə mehriban dostluğun nümayişi deyil, həm də konkret nəticələr doğuran siyasi və iqtisadi platforma idi. Yüksək Dövlət Şurasının iclasında qəbul edilən qərarlar enerji, nəqliyyat, sənaye, rəqəmsallaşma və mədəni sahələrdə əməkdaşlığı daha da dərinləşdirəcək.
Prezident İlham Əliyevin səfəri göstərdi ki, Azərbaycan regionda sülhün, sabitliyin və qarşılıqlı etimadın dayağıdır. Bu səfər həm də Qazaxıstanın Orta Asiyada, Azərbaycanın isə Cənubi Qafqazda artan nüfuzunun və strateji əhəmiyyətinin birləşdiyi məqam oldu”.
Ü.Həmzəyeva ölkələr arasında iqtisadi münasibətlərə də toxunub: “Əvvəla, iqtisadi münasibətlər keyfiyyətcə yeni mərhələyə qədəm qoyur. Ticarət dövriyyəsinin artırılması, “Orta Dəhliz” üzrə nəqliyyat-logistika əməkdaşlığının gücləndirilməsi hər iki dövlət üçün böyük iqtisadi imkanlar yaradır. Bu dəhliz Avropadan Asiyaya uzanan strateji xəttdir və Azərbaycanla Qazaxıstan bu xəttin əsas həlqələrindəndir.
Bundan başqa, sənaye və texnoloji sahələrdə birgə müəssisələrin yaradılması, yaşıl enerji layihələri, süni intellekt və rəqəmsal iqtisadiyyat istiqamətində birgə təşəbbüslər hər iki ölkənin modern inkişafına xidmət edəcək. Mədəni və humanitar müstəvidə də əlaqələr dərinləşəcək, gənclər, tələbələr, mədəniyyət xadimləri üçün mübadilə proqramlarının genişlənməsi planlaşdırılır.
Bu əməkdaşlıq təkcə iqtisadi maraqlara deyil, həm də ortaq milli kimliyimizin, türk birliyinin möhkəmlənməsinə xidmət edir.
Prezident İlham Əliyevin Qazaxıstana səfəri Cənubi Qafqaz və Mərkəzi Asiya regionlarını birləşdirən strateji körpünün daha da möhkəmlənməsinə təkan verdi. Bu, həm iqtisadi, həm siyasi, həm də təhlükəsizlik baxımından mühüm hadisədir. Azərbaycan və Qazaxıstanın birgə təşəbbüsləri regional sabitliyə, enerji təhlükəsizliyinə və nəqliyyat infrastrukturunun şaxələnməsinə real töhfə verir.
Bu səfər eyni zamanda türk dünyasının iqtisadi və mənəvi həmrəyliyinin güclənməsini nümayiş etdirdi. Prezident İlham Əliyevin rəhbərliyi ilə Azərbaycan artıq regional əməkdaşlığın təşəbbüskarı və icraedici qüvvəsi kimi çıxış edir. Qazaxıstanla münasibətlərin bu səviyyəyə çatması, əslində, türk dünyasının gələcəyinə inamın təcəssümüdür”.
Günel Verdiyeva
16:25 22.10.2025
Oxunuş sayı: 3144
