Deputat: Azərbaycan-Qazaxıstan əlaqələri sütun xətləri kimi genişlənir
Azərbaycan Prezidenti İlham Əliyev oktyabrın 20-də Qazaxıstan Respublikasına rəsmi səfərə gedib. Dövlət başçısının bu səfəri iki ölkə arasında strateji tərəfdaşlıq münasibətlərinin daha da möhkəmləndirilməsi, iqtisadi, nəqliyyat, enerji və humanitar sahələrdə əməkdaşlığın genişləndirilməsi baxımından mühüm əhəmiyyət daşıyır. Səfər çərçivəsində Prezident İlham Əliyevin Qazaxıstan Prezidenti Kasım-Jomart Tokayevlə görüşü, birgə bəyannamənin imzalanması və bir sıra ikitərəfli sənədlərin razılaşdırılması nəzərdə tutulub. Bu səfər həm də Türk Dövlətləri Təşkilatı çərçivəsində əməkdaşlığın dərinləşdirilməsi və regionda yeni nəqliyyat-loqistika layihələrinin reallaşdırılması istiqamətində önəmli mərhələ kimi qiymətləndirilir.
Milli Məclisin deputatı, ADA Universitetinin prorektoru Fariz İsmayılzadə Crossmedia.az-a açıqlamasında səfərin iki ölkə münasibətlərinə təsirini belə dəyərləndirib: "Azərbaycan və Qazaxıstan arasında əlaqələr qarşılıqlı olaraq çox faydalıdır. Əməkdaşlıq həm ikitərəfli, həm də çoxtərəfli - beynəlxalq təşkilatlar çərçivəsində uğurla gedir. Geniş spektrli gündəmə ticarət, enerji, investisiyalar, yaşıl energetika, nəqliyyat dəhlizlərinin - o cümlədən Orta Dəhlizin - inkişafı daxildir. Türk dünyası çərçivəsində də əməkdaşlıq çox geniş inkişaf edir və iki dövlət böyük Xəzər, Avropa və Asiyanı birləşdirən regionunun sütun xətləri kimi çıxış edərək gələcək üçün geniş perspektivlər açır".
Deputatın sözlərinə görə, səfər, eyni zamanda, Orta Dəhliz boyunca koordinasiyanın dərinləşdiyi mərhələyə təsadüf edir: "Bu ayın əvvəlində Azərbaycan, Qazaxıstan və Gürcüstan dəmir yolu operatorları marşrut üzrə vahid uzunmüddətli tarif barədə razılaşıblar. Ekspert və media şərhlərinə görə, əməkdaşlıq təkcə enerji daşınmalarını deyil, rəqəmsallaşma, ticarət, tranzit və logistika sahələrini də əhatə edərək Orta Dəhlizin rəqabət qabiliyyətini artırır".
Fidan Qarayeva
15:59 21.10.2025
Oxunuş sayı: 1666
