Azərbaycanın Türk dövlətləri ilə texnologiya və iqtisadiyyat əməkdaşlığında yeni dövrü başlayır- Rəy
Oktyabrın 23-24-də Bakıda İqtisadiyyat Nazirliyinin təşkilatçılığı ilə Türk Dövlətləri Təşkilatına (TDT) üzv ölkələrin Sənaye, Elm, Texnologiya və İnnovasiya Nazirlərinin 2-ci İclası keçiriləcək. İclasın əsas məqsədi TDT ölkələri arasında sənaye, elm, texnologiya, innovasiya, investisiya və sahibkarlığın inkişafı sahələrində əməkdaşlığın gücləndirilməsidir. Toplantı çərçivəsində həm işçi qrup iclası, həm də nazirlər səviyyəsində müzakirələr aparılacaq, Fəaliyyət Planında nəzərdə tutulan təşəbbüslərin icrası və gələcək əməkdaşlıq mexanizmləri barədə fikir mübadiləsi həyata keçiriləcək. Bu tədbir TDT ölkələri arasında strateji tərəfdaşlığın inkişafı və regional iqtisadi əməkdaşlığın möhkəmləndirilməsi baxımından böyük əhəmiyyət daşıyır.
Mövzu ilə bağlı Crossmedia.az-a iqtisad üzrə fəlsəfə doktoru Aqil Eyvazov bildirib ki, son dövrlərdə Türk Dövlətləri Təşkilatı çərçivəsində nəqliyyat-logistika, enerji, rəqəmsal texnologiyalar və startap ekosistemləri üzrə əməkdaşlıqların sürətlə genişləndiyi müşahidə olunur.
“Bu fonda Bakıda keçiriləcək sənaye, elm və texnologiya nazirlərinin görüşü yalnız sıradan iclas deyil — Azərbaycanın türkdilli ölkələrlə inteqrasiyasının yeni dönəmidir. Azərbaycan burada təşəbbüskar mövqedə çıxış edərək, texnologiya transferi, sənaye parkları və birgə innovasiya platformaları kimi konkret addımlarla iqtisadiyyatını şaxələndirmək imkanını əldə edir. Bu görüş həm ölkəmizin strategiyasını, həm də regionda əməkdaşlıq modelinin keyfiyyətini yenidən formalaşdırmaq üçün mühüm şansdır”.
Mehriban Yariyeva
18:58 18.10.2025
Oxunuş sayı: 8239
