Rusiya bu gecə Ukraynaya genişmiqyaslı raket və dron hücumu həyata keçirdi
Bu gecə Rusiya Federasiyası Ukraynaya qarşı yüzlərlə pilotsuz uçuş aparatı (PUA), həmçinin qanadlı və ballistik raketlərin iştirakı ilə genişmiqyaslı kombinə olunmuş hücum həyata keçirib.
Crossmedia.az xarici KİV-ə istinadən xəbər verir.
Əsas zərbələrdən biri Lvov şəhərinə endirilib. Şəhər dörd saat ərzində intensiv raket və dron hücumuna məruz qalıb. Nəticədə şəhərin bir hissəsi işıqsız qalıb, ictimai nəqliyyatın fəaliyyəti müvəqqəti dayandırılıb. Bildirilir ki, hücum zamanı Rusiya ordusu “Kinjal” hipersəs raketlərindən də istifadə edib.
Hücum nəticəsində Zaporojye vilayətinin bir hissəsi də enerji təchizatından məhrum olub — 73 mindən çox abonent işıqsız qalıb. İlkin məlumatlara görə, bir nəfər həyatını itirib.
İvano-Frankovsk vilayətində “Kalibr” tipli raketlər Kolomiya və Burştın şəhərləri istiqamətində atılıb.
Məlumatlara əsasən, Ukraynanın bir sıra digər bölgələri də bu gecəki hava hücumlarının hədəfi olub.
11:28 05.10.2025
Oxunuş sayı: 8687
