Deputat: “Azərbaycanla Özbəkistan arasında əlaqələrin inkişafı üçün geniş imkanlar mövcuddur” - AÇIQLAMA
Özbəkistan Prezidenti Şavkat Mirziyoyevin Azərbaycana planlaşdırılan rəsmi səfəri iki ölkə arasında strateji tərəfdaşlığın dərinləşməsi baxımından mühüm əhəmiyyət daşıyır. Bu səfər siyasi, iqtisadi və mədəni əlaqələrin daha da möhkəmləndirilməsinə, həmçinin türk dünyasında inteqrasiyanın güclənməsinə töhfə verə bilər. Mövzu ilə bağlı deputat Müşfiq Cəfərov Crossmedia.az-a açıqlama verib.
M.Cəfərovun sözlərinə görə, hazırda Azərbaycan və Özbəkistan arasında əlaqələrin daha da inkişafı üçün geniş imkanlar mövcuddur. Onun sözlərinə görə, hər iki ölkə arasında dərin tarixi köklərə söykənən münasibətlər var və bu əsasda qarşılıqlı əməkdaşlıq ildən-ilə güclənir.
Deputat qeyd edib ki, 2017-ci ildən bu günə qədər Azərbaycanla Özbəkistan arasında 150-yə yaxın qarşılıqlı səfər həyata keçirilib. Bu dövr ərzində qarşılıqlı ticarət dövriyyəsi 5 dəfə artıb. Müşfiq Cəfərov bu faktları ikitərəfli əlaqələrin yüksələn xətt üzrə inkişaf etdiyinin göstəricisi kimi qiymətləndirib.
Müşfiq Cəfərov bildirib ki, sənayenin müxtəlif sahələrində əməkdaşlığın genişləndirilməsi üçün birgə səylər göstərilir. Xüsusilə avtomobil istehsalı, tekstil və ipəkçilik sahələrində birgə layihələrin icrasına başlanılıb.
Deputat vurğulayıb ki, iki ölkə arasında yükdaşımaların həcmi də artaraq 1 milyon tona çatıb. Bu göstərici iqtisadi əlaqələrin dinamik inkişafından xəbər verir.
Onun sözlərinə görə, dövlət tərəfindən münasibətlərin tərəqqi etməsi istiqamətində çoxşaxəli addımlar atılıb və bu istiqamətdə birgə səylər nəticəsində mövcud olan qarşılıqlı əlaqələrin inkişaf dinamikasına nail olunub.
M.Cəfərov diqqətə çatdırıb ki, hazırda investisiya imkanlarının daha da artırılması xüsusi olaraq gündəmdədir. Ölkələr arasında iqtisadi əməkdaşlıq yeni mərhələyə qədəm qoyur.
Deputat bildirib ki, son dövrlərdə birgə həyata keçirilən layihələrin əksəriyyəti ölkələrimizin bölgələrində reallaşdırılır. “Ötən il Özbəkistanda dövlət başçılarının iş adamları ilə görüşü çərçivəsində icrasına start verilən birgə layihələrin çoxu məhz ölkələrimizin bölgələrində reallaşdırılır”, – deyə o qeyd edib.
Müşfiq Cəfərovun fikrincə, bu layihələr bölgələrin tarazlı inkişafına töhfə verməklə yanaşı, iqtisadi tərəfdaşlığın intensivləşdirilməsinə xidmət edir. Onun sözlərinə görə, bu, əməkdaşlığın yalnız başlanğıcıdır: “Hesab edirəm ki, bu, hələ başlanğıcdır, bizi qarşıda daha böyük layihələrin icrası gözləyir”.
Deputat əlavə edib ki, səfər çərçivəsində yeni istehsal sahələrinin müəyyənləşdirilməsi istiqamətində də mühüm müzakirələrin aparılması gözlənilir. Onun sözlərinə görə, son illərdə Prezident İlham Əliyevin həyata keçirdiyi səfərlər və imzaladığı mühüm sənədlər artıq real nəticələrini verməyə başlayır.
M.Cəfərovun sözlərinə görə, Özbəkistanla avtomobil istehsalı sahəsində birgə layihələrlə bağlı əhəmiyyətli uğurlar əldə edilib. O bildirib ki, “Azərmaş” ASC və Özbəkistanın “Uzavtosanoat” ASC-si “Chevrolet” markalı avtomobillərin və onların ehtiyat hissələrinin istehsalı məqsədilə Hacıqabul Sənaye Parkında işlərini davam etdirir.
Deputat qeyd edib ki, bu gün Bakıda təşkil edilən III Azərbaycan–Özbəkistan Regionlararası Forumu çərçivəsində ölkələrimizin bölgələri arasında əlaqələrin genişləndirilməsi və birgə layihələrin reallaşdırılması ilə bağlı müzakirələr aparılıb. Bu Forumun da qarşılıqlı əməkdaşlığın dərinləşməsində mühüm rol oynayacağı gözlənilir.
Fatimə Nəbiyeva
09:47 21.06.2025
Oxunuş sayı: 898
