Süni intellekt alimləri qabaqladı: DNT-də bilinməyən sistem tapdı
Süni intellekt modeli "Claude" biologiya sahəsində diqqətçəkən kəşfə imza atıb. Model bakteriyaları yoluxduran virusların DNT-sində indiyədək tam xarakterizə edilməmiş yeni ferment sistemini aşkarlayıb.
Crossmedia.az xəbər verir ki, bu barədə ABŞ-nin “Anthropic” şirkətinin açıqlamasına görə, kəşf şirkətin yaratdığı biologiya laboratoriyasında aparılan tədqiqatlar zamanı baş verib.
Araşdırmada təxminən 950 "Claude" agentindən istifadə olunub. Süni intellekt agentləri 21 saat ərzində 210 milyon token həcmində məlumatı təhlil edərək böyük DNT məlumat bazalarında araşdırma aparıblar.
Nəticədə agentlərdən biri əvvəllər diqqətdən kənarda qalmış qeyri-adi DNT təkrarlarını müəyyən edib. Sonrakı təhlillər və laboratoriya sınaqları bu strukturun yeni ferment sisteminə aid olduğunu üzə çıxarıb.
Tədqiqatçılar yeni sistemi ART (Array-associated reverse transcriptases) adlandırıblar. Onun bəzi xüsusiyyətləri genlərin redaktəsində istifadə olunan "CRISPR" texnologiyasını xatırladır.
ART sistemi RNT-dəki məlumatı DNT-yə köçürən fermentdən, köməkçi gendən və təkrarlanan DNT ardıcıllıqlarından ibarətdir. İlkin laboratoriya təcrübələri zamanı bu təkrarlardan qısa RNT molekullarının yarandığı da müəyyən edilib.
Bununla belə, alimlər yeni sistemin təbiətdə hansı funksiyanı yerinə yetirdiyini hələ müəyyənləşdirə bilməyiblər. Onun gələcəkdə gen mühəndisliyi və tibbi tədqiqatlarda istifadə imkanları da araşdırılmalıdır.
Qeyd edək ki, “Anthropic” şirkətinin nümayəndələri araşdırmanın əsas hissəsinin "Claude" tərəfindən aparıldığını, laboratoriya sınaqlarının isə insanlar tərəfindən həyata keçirildiyini bildiriblər. Kəşflə bağlı ilkin elmi hesabat dərc edilsə də, nəticələrin müstəqil elmi qiymətləndirilməsi hələ davam etməlidir.
05:20 17.11.2026
Oxunuş sayı: 31