TASS: Avropa Ukrayna üzrə danışıqları pozmağa çalışır
Avropa İttifaqı və Böyük Britaniya Ukrayna münaqişəsinin həlli ilə bağlı Rusiya ilə mümkün danışıqlarda iştirak etmək üçün yeddi nəfərlik nümayəndə qrupu formalaşdırıb. Lakin Moskva Avropanın bu prosesdə konstruktiv mövqe nümayiş etdirəcəyinə şübhə ilə yanaşır.
Crossmedia.az xəbər verir ki, bu barədə TASS agentliyin siyasi şərhçisi Andrey Nizamutdinovun analitik məqaləsində bildirilib.
Məqalədə qeyd olunur ki, Avropa ölkələri arasında nümayəndə heyətinin tərkibi ilə bağlı fikir ayrılıqları yaranıb. Nəticədə qrupa Aİ Şurası, Avropa Komissiyası, Almaniya, Fransa, İtaliya, Polşa və Böyük Britaniyanın nümayəndələrinin daxil edilməsi qərara alınıb.
Müəllifin fikrincə, Avropa ölkələrinin əsas narahatlığı Rusiya və ABŞ-nin onların iştirakı olmadan Ukrayna məsələsində razılığa gəlməsi ehtimalıdır. Bu səbəbdən Avropa danışıqlar prosesində təmsil olunmağa çalışır.
Yazıda Almaniya kansleri Fridrix Merts və Fransa Prezidenti Emmanuel Makronun açıqlamalarına da diqqət çəkilir. Merts Rusiya ilə dialoqun güc mövqeyindən aparılmasının tərəfdarı olduğunu bildirib. Makron isə münaqişə başa çatdıqdan sonra Ukraynanın NATO-ya qəbul edilməsinin vacibliyini vurğulayıb.
TASS müəllifinin qənaətinə görə, bu mövqelər Moskvanın təhlükəsizliklə bağlı tələbləri ilə ziddiyyət təşkil edir və Avropanın danışıqlarda iştirak etmək istəyinin sülhə nail olmaqdan daha çox prosesə təsir göstərmək məqsədi daşıdığını göstərir.
Məqalədə həmçinin Avropa nümayəndələrinin Əbu-Dabidə keçirilən üçtərəfli danışıqlara buraxılmadığı qeyd olunur. Müəllif hesab edir ki, Avropa ölkələri arasında mövcud fikir ayrılıqları və Rusiyanın təhlükəsizlik təşəbbüslərinə münasibət danışıqların perspektivini çətinləşdirir.
Qeyd edək ki, material TASS-ın müəllif şərhidir və burada səsləndirilən qiymətləndirmələr agentliyin şərhçisinin mövqeyini əks etdirir.
02:01 17.11.2026
Oxunuş sayı: 23