İran XİN: ABŞ-nin heç bir hərbi hücumu cavabsız qalmayacaq
İran ABŞ və ya digər ölkələr tərəfindən ona qarşı həyata keçiriləcək hər hansı hərbi hücuma cavab verəcəyini bəyan edib.
Crossmedia.az xəbər verir ki, İran Xarici İşlər Nazirliyinin sözçüsü İsmayıl Bəqai bu barədə Tehranda keçirdiyi mətbuat konfransında danışıb.
Bəqai bildirib ki, İranın ABŞ-nin təcavüzünə cavab verəcəyi əvvəllər də dəfələrlə bəyan edilib və ölkəsinə qarşı heç bir zərbə cavabsız qalmayacaq.
Onun sözlərinə görə, İran təhlükəsizliyini və milli maraqlarını qorumaq üçün öz imkanlarına güvənir. Diplomasiyadan istifadə etməsi və danışıqlara hazır olması isə Tehranın hər hansı tərəfə ümid bəslədiyi anlamına gəlmir.
Bəyanat İran İnqilab Keşikçiləri Korpusunun (SEPAH) Bəhreyndəki Ər-Rifaa helikopter bazasında yerləşən ABŞ radarına altı pilotsuz uçuş aparatı ilə hücum etdiyini açıqlamasından sonra səsləndirilib. SEPAH bu addımı ABŞ-nin hərbi əməliyyatlarına cavabın ikinci mərhələsi kimi təqdim edib.
Xatırladaq ki, noyabrın 13-də də SEPAH Bəhreyndəki ABŞ erkən xəbərdarlıq radarını məhv etdiyini iddia etmişdi. ABŞ Mərkəzi Komandanlığı (CENTCOM) isə bu məlumatı təkzib edərək iki İran PUA-sının ələ keçirildiyini, hadisə nəticəsində xəsarət alan və ya dağıntı olmadığını bildirmişdi. Son hücumla bağlı İranın iddiası da hələlik ABŞ və Bəhreyn rəsmiləri tərəfindən təsdiqlənməyib.
13:01 15.11.2026
Oxunuş sayı: 56
