İsrailin Qəzza zolağına hücumları nəticəsində 2 fələstinli həlak olub, 7 nəfər yaralanıb
İsrail ordusunun atəşkəsə baxmayaraq Qəzza zolağının müxtəlif bölgələrinə hücumları nəticəsində iki fələstinli həyatını itirib, aralarında azyaşlı qızın da olduğu 7 nəfər yaralanıb.
Crossmedia.az xəbər verir ki, Qəzza zolağının şimalındakı Səfatavi bölgəsinin bombalanması nəticəsində iki fələstinli ölüb, üç nəfər yaralanıb. Şahidlərin sözlərinə görə, İsrailə məxsus pilotsuz uçuş aparatı (PUA) Əbu Şərh yolayrıcının yaxınlığında olan mülki şəxsləri iki raketlə hədəfə alıb.
Bundan başqa, Sudaniyyə bölgəsində İsrail qüvvələrinin açdığı atəş nəticəsində bir fələstinli çiynindən yaralanıb. Qəzza şəhərinin şərqindəki Tuffah məhəlləsində də fələstinlilərə məxsus obyektlər və evlər bombalanıb, məcburi köçkünlərin çadırları atəşə tutulub.
Qəzza zolağının cənubunda yerləşən Xan Yunis şəhərində də İsrail hərbçilərinin atəşi nəticəsində iki fələstinli yaralanıb. Şəhərin müxtəlif əraziləri səhər saatlarında da atəşə tutulub, şimal-şərq hissəsi artilleriya zərbələrinə məruz qalıb.
Bundan əlavə, İsrailin iki həftə əvvəl Rəfahın Məvasi bölgəsinə endirdiyi zərbə nəticəsində yaralanan Nidal Zərab müalicə aldığı xəstəxanada dünyasını dəyişib.
Məlumata görə, İsrail ordusunun Bureyc qaçqın düşərgəsinin şərq və şimal hissələrini bombalaması nəticəsində 9-cu blokda bir qız uşağı da ayağından yaralanıb.
Qeyd edək ki, Qəzza Səhiyyə Nazirliyinin son məlumatlarına əsasən, atəşkəs qüvvəyə mindikdən sonra İsrailin hücumları və atəşkəs pozuntuları nəticəsində 1643 fələstinli həlak olub, 5964 nəfər yaralanıb. 850 nəfərin meyiti dağıntılar altından çıxarılıb.
2023-cü ilin oktyabrından bəri İsrailin Qəzza zolağına hücumları nəticəsində isə 74 mindən çox fələstinli həyatını itirib, 176 mindən çox insan yaralanıb. Hücumlar Qəzzanın infrastrukturunun təxminən 90 faizinin dağıdılmasına səbəb olub.
11:44 15.11.2026
Oxunuş sayı: 75
