ABŞ-də yük və sərnişin təyyarələri hava limanında toqquşub
ABŞ-nin Florida ştatında yerləşən Mayami Beynəlxalq Hava Limanında UPS aviaşirkətinə məxsus yük təyyarəsi ilə Copa Airlines şirkətinin sərnişin təyyarəsi toqquşub.
Crossmedia.az xəbər verir ki, hadisə noyabrın 14-də, yerli vaxtla saat 21:15 radələrində iki uçuş-enmə zolağı arasındakı hərəkət yolunun kəsişməsində baş verib.
Toqquşmada UPS şirkətinə məxsus “Boeing 767” yük təyyarəsi və Copa Airlines-ın “Boeing 737” sərnişin təyyarəsi iştirak edib. Panama şəhərindən Mayamiyə gələn sərnişin təyyarəsinin qanad ucu yük təyyarəsinin burun hissəsinə toxunub.
Mayami Beynəlxalq Hava Limanının kommunikasiya direktoru Qreq Çin bildirib ki, hadisə nəticəsində iki nəfər yüngül xəsarət alıb. Onlara hadisə yerində tibbi yardım göstərilib və xəstəxanaya aparılmalarına ehtiyac yaranmayıb.
Məlumata görə, UPS-ə məxsus 358 saylı reys Mayamidən Kolumbiyanın paytaxtı Boqotaya uçmağa hazırlaşırmış. Copa Airlines-ın 427 saylı reysi isə Panama şəhərindən Mayamiyə eniş edibmiş.
Hadisədən sonra təyyarələrin hərəkəti alternativ yollara yönləndirilib. Hava limanının ümumi fəaliyyətində ciddi fasilə yaranmadığı bildirilib.
10:55 15.11.2026
Oxunuş sayı: 113
