Microsoft xidmətlərindəki qlobal nasazlıq aradan qaldırılıb
ABŞ-nin texnologiya şirkəti Microsoft-un Microsoft 365, Outlook və Teams xidmətlərində yaranan giriş problemlərinin aradan qaldırılması istiqamətində işlər tamamlanıb.
Crossmedia.az xəbər verir ki, bu barədə şirkətin Microsoft 365 hesabından ABŞ mərkəzli “X” sosial şəbəkəsində açıqlama verilib.
Bildirilib ki, nasazlıqdan təsirlənən müştərilər və regionlarda xidmətlərin bərpası təmin edilib. Məsələ ilə bağlı digər yeniliklərin Microsoft 365 İdarəetmə Mərkəzində MO1550821 nömrəli qeyd vasitəsilə əldə edilə biləcəyi vurğulanıb.
Qeyd edək ki, noyabrın 12-də Microsoft 365, Outlook və Teams xidmətlərində giriş problemləri yaranıb. Şirkətin ilkin açıqlamasına əsasən, bir neçə regiondakı infrastrukturun ayrı-ayrı hissələrində yük artımı qeydə alınıb. Bunun səbəbi trafik intensivliyinin yüksəlməsi deyil, bəzi serverlərin gözlənilmədən sıradan çıxması olub. Nəticədə digər serverlərin üzərinə düşən yük artıb və bağlantı xətaları yaranıb.
Nasazlıq zamanı dünyanın 70-dən çox ölkəsində istifadəçilər xidmətlərə girişlə bağlı problemlər yaşayıb. Bu vəziyyət dövlət qurumlarının və şirkətlərin fəaliyyətinə də təsir göstərib. Xüsusilə Outlook və Teams istifadəçiləri elektron poçta daxil olmaq, təqvimləri idarə etmək və onlayn görüşlər keçirmək imkanlarında çətinliklərlə üzləşiblər.
12:00 15.11.2026
Oxunuş sayı: 74
