Pandemiya bu şəxslərin daha tez qocalmağına səbəb olub
COVID-19 pandemiyasının yaratdığı stressin bioloji qocalmanı sürətləndirdiyi məlum olub.
Crossmedia.az xarici KİV-ə istinadən xəbər verir ki, Almaniyada 1000-dən çox insan üzərində aparılan tədqiqat göstərib ki, bu təsir xüsusilə yeniyetmələrdə daha qabarıq şəkildə müşahidə olunur.
Məlumdur ki, stress təkcə psixi sağlamlığa deyil, həm də orqanizmin bioloji fəaliyyətinə təsir göstərir.
Yeni tədqiqat, COVID-19 pandemiyası dövründə yaşanan stressin bioloji qocalma prosesini sürətləndirdiyini göstərən nəticələr ortaya qoyub.
"Proceedings of the National Academy of Sciences" (PNAS) jurnalında dərc olunan bu tədqiqatda Almaniyada 1000-dən çox insandan götürülmüş tüpürcək nümunələri araşdırılıb.
Qocalma ilə əlaqəli DNT dəyişiklikləri, iştirakçılardan pandemiya dövründən əvvəl və sonra götürülmüş nümunələrin müqayisəsi yolu ilə qiymətləndirilib.
Tədqiqatçılar üç fərqli qrupu – uşaqları, yeniyetmələri və 20–29 yaş arası böyükləri araşdırıblar. 2020-ci ilin martında tətbiq edilən ilk karantin rejimindən əvvəl toplanmış nümunələr, 2021–2022-ci illər ərzində götürülmüş nümunələrlə müqayisə edilib.
Tədqiqatda istifadə olunan bioloji qocalma ilə bağlı dörd fərqli ölçüdən üçü, iştirakçılar arasında müxtəlif yaş qruplarında qocalma tempinin sürətləndiyini göstərib.
Bununla belə, pandemiya dövründə yaşanan stress ilə bioloji qocalma arasındakı əlaqə yalnız yeniyetmələrdə müşahidə olunub.
Bioloji qocalmanın daha sürətlə getdiyinə dair daha güclü sübutlar, xüsusilə azadlıqlarının məhdudlaşdırılmasından və yaxınlarından ayrı düşməkdən daha çox təsirlənən yeniyetmələr arasında aşkar edilib.
05:21 15.11.2026
Oxunuş sayı: 146
