Rusiya ilə bağlı narahatlıq: Baltik ölkələri risk altındadır?
Ukraynalı hərbi analitik Andrey Kramarov Rusiyanın müharibəni Avropanın digər ölkələrinə yaymaq ehtimalından danışaraq Latviya, Litva və Estoniyanın mümkün risklərlə üzləşə biləcəyini iddia edib.
Crossmedia.az xəbər verir ki, “UNIAN” nəşri bu barədə “Ukrayna Radiosu”na istinadən məlumat yayıb.
Ukrayna Silahlı Qüvvələrinin ehtiyatda olan zabiti Kramarov bu fikirləri Rusiya Prezidenti Vladimir Putinin 2030-cu ilədək Avropa ilə mümkün müharibə barədə açıqlamalarını şərh edərkən səsləndirib.
Ekspertin sözlərinə görə, Rusiyada müharibədən iqtisadi və siyasi fayda əldə edən elita təbəqəsi formalaşıb və bu qüvvələr münaqişənin davam etməsində maraqlı ola bilərlər. O, hərbi əməliyyatların genişlənməsinin həmin dairələr tərəfindən gəlir imkanlarının artması kimi qiymətləndirilə biləcəyini bildirib.
Kramarov Baltik ölkələrinə qarşı mümkün təhlükədən danışarkən 1940-cı ildə Sovet İttifaqının Litva, Latviya və Estoniyanı işğal etməsini də xatırladıb. Onun fikrincə, Rusiyanın Ukraynada qarşıya qoyduğu məqsədlərə çatmaması Moskvanın NATO üzvü olan Baltik ölkələrinə təzyiq və ya hücum ehtimalını tamamilə istisna etmir.
Kramarov Rusiyanın Finlandiyaya hücum ehtimalını isə Moskva üçün riskli addım hesab edib. O, 1939–1940-cı illərdə Sovet İttifaqı ilə Finlandiya arasında baş vermiş Qış müharibəsini xatırladaraq, həmin münaqişənin Moskva üçün uğurlu nəticələnmədiyini bildirib.
Hərbi analitik Avropa ölkələrinin müasir müharibə şəraitinə hələ tam hazır olmadığını da iddia edib. Onun fikrincə, Avropa dövlətləri Ukrayna-Rusiya müharibəsinin təcrübəsini nəzərə alaraq müdafiə hazırlığını gücləndirməlidirlər.
Kramarov Almaniya hərbçilərinin bir hissəsinin Estoniyaya göndərilməsini Avropanın təhlükəsizlik risklərinə diqqətinin artmasının göstəricisi kimi qiymətləndirib. O, Ukraynada müharibənin ilk günlərində Kiyevin müdafiəsinin uğursuz olması halında Polşanın da təhlükə ilə üzləşə biləcəyini iddia edib.
Xatırladaq ki, Rusiya Prezidenti Vladimir Putin daha əvvəl Avropanın 2030-cu ilədək Rusiya ilə müharibəyə hazırlaşdığını, Moskvanın isə müharibə istəmədiyini bildirmişdi. Putin həmçinin Rusiyanın Baltik dənizində yaranacaq istənilən çağırışa cavab verməyə hazır olduğunu bəyan edib.
16:50 01.11.2026
Oxunuş sayı: 51
