Zelenski: Oktyabrda Rusiya ordusunun itkiləri rekord həddə çatıb
Ukrayna Prezidenti Volodimir Zelenski oktyabr ayında Rusiya ordusunun itkilərinin müharibənin başlanmasından bəri ən yüksək aylıq göstəriciyə çatdığını iddia edib. Crossmedia.az xəbər verir ki, Ukrayna Prezidentinin açıqlamasında bu barədə məlumat verilib.
Zelenskinin sözlərinə görə, Ukrayna Müdafiə Qüvvələri oktyabrda qarşı tərəfə rekord itkilər verdirib və Rusiya qüvvələrinin ələ keçirdiyindən daha çox ərazini geri qaytarıb.
O bildirib ki, bir ay ərzində Rusiya ordusunun 54 400 hərbçisi həlak olub və ya ağır yaralanıb. Zelenski bu göstəricinin 2022-ci ildə genişmiqyaslı müharibə başlayandan bəri istənilən ay üzrə qeydə alınan ən yüksək rəqəm olduğunu vurğulayıb.
Ukrayna Prezidentinin açıqlamasına əsasən, oktyabrın 21-də Rusiya ordusunun gündəlik itkiləri də rekord səviyyəyə çatıb. Həmin gün 2 250 hərbçinin həlak olduğu və ya yaralandığı iddia edilir.
Zelenski Rusiyanın bu itkiləri dayandırması üçün atəşkəsə razılıq verməli və diplomatik danışıqlara başlamalı olduğunu bildirib.
Qeyd edək ki, bu rəqəmlər Ukrayna tərəfinin açıqladığı məlumatlara əsaslanır və müstəqil şəkildə təsdiqlənməyib. “Kyiv Independent” nəşrinin məlumatına görə, Ukrayna Baş Qərargahı oktyabr ayı üzrə 54 400 nəfərlik göstəricini həlak olan, yaralanan və itkin düşən hərbçilərin ümumi sayı kimi təqdim edib.
16:45 01.11.2026
Oxunuş sayı: 50
