Rusiya-Ukrayna danışıqlarına mane olan əsas məqam açıqlanıb
ABŞ-nin Müharibənin Öyrənilməsi İnstitutunun (ISW) analitikləri hesab edirlər ki, Kreml Ukraynanın Rusiya ərazisinə uzaqmənzilli zərbələrini sülh danışıqlarına maneə kimi təqdim etməklə danışıqların irəliləməməsinə görə məsuliyyəti Kiyevin üzərinə qoymağa çalışır.
Crossmedia.az xəbər verir ki, “UNIAN” nəşri ISW-nin hesabatına istinadən bu barədə məlumat yayıb.
ISW-nin oktyabrın 31-də dərc etdiyi təhlilə görə, Rusiyanın xarici işlər naziri Sergey Lavrov oktyabrın 30-da Ukraynanın Rusiya ərazisinin dərinliklərinə endirdiyi zərbələrdən narazılığını ifadə edib. O, bu addımların Ukraynanın danışıqlara hazır olduğunu göstərmədiyini iddia edib.
Analitiklər isə Lavrovun açıqlamasında Rusiyanın Ukrayna ərazisinə gündəlik hücumlarının nəzərə alınmadığını bildirirlər. Onların fikrincə, Kreml ABŞ və Ukraynanın enerji infrastrukturlarına zərbələrin dayandırılması ilə bağlı moratorium təkliflərini dəfələrlə rədd edib.
ISW qeyd edir ki, Kreml daha əvvəl də sülh danışıqlarında irəliləyişin olmamasına görə məsuliyyətdən yayınmaq üçün Ukraynanın real və ya iddia edilən hücumlarından istifadə edib. Hesabatda 2025-ci ilin dekabrında Novqorod vilayətində Vladimir Putinin iqamətgahına hücum barədə yayılan məlumatlar və 2026-cı ilin yanvarında işğal altındakı Xerson vilayətinin Xorlı yaşayış məntəqəsində baş verdiyi bildirilən zərbə nümunə kimi göstərilir.
Bununla yanaşı, Kreml Avropa liderlərinin sülh danışıqlarında iştirak etməməsi istiqamətində də mövqeyini davam etdirir. Lavrov Avropa ölkələrinin danışıqlar prosesinə qoşulmağa çalışdığını bildirib və onların iştirakının məqsədəuyğunluğunu şübhə altına alıb.
Hesabatda vurğulanır ki, Rusiya rəhbərliyi son günlər NATO-nun 1997-ci il sərhədlərinə qayıtması tələbini də yenidən gündəmə gətirib. Kreml Avropa liderlərinin müharibənin başa çatdırılması ilə bağlı danışıqlarda iştirakına qarşı çıxış edir.
16:37 01.11.2026
Oxunuş sayı: 59
