Rusiyanın bot ordusu Polşadakı münaqişəni qızışdırır
Polşanın Baş naziri Donald Tusk hesab edir ki, ölkənin Konstitusiya Tribunalı ətrafında yaranan mübahisə artıq sırf daxili məsələ olmaqdan çıxıb. Onun sözlərinə görə, Polşada demokratiyanın zəifləməsində maraqlı olan qüvvələr münaqişəyə müdaxilə edir.
Crossmedia.az xəbər verir ki, hökumət başçısı bu barədə sosial şəbəkədə yayımladığı video müraciətində danışıb.
Tusk bildirib ki, Polşada uzun illərdir demokratiyanı və hüququn aliliyini zəiflətməyə çalışan siyasətçilər və təşkilatlar fəaliyyət göstərir. Onun fikrincə, bu qüvvələr xaricdən, xüsusilə Rusiyaya rəğbət bəsləyən dairələrdən dəstək alırlar.
“Onların dünyada rusiyapərəst qüvvələr tərəfindən dəstəklənməsi təsadüfi deyil. Bu gün isə həmin qüvvələr münaqişədə internetdəki Rusiya bot ordusunun dəstəyindən istifadə edirlər. Hətta Kremlin əsas ideoloqundan açıq təriflər də alıblar”, – deyə Polşanın Baş naziri bildirib.
Tusk Konstitusiya Tribunalının fəaliyyətində dəyişikliklərin həyata keçirilməsinə maneələr yaradılmasına görə Polşa Prezidenti Karol Navrotski və müxalifətdəki “Hüquq və Ədalət” (PiS) partiyasını məsul tutub.
Baş nazir vurğulayıb ki, Polşa uzun illər uğrunda mübarizə apardığı müstəqil demokratiyadan və hüququn aliliyindən geri çəkilməməlidir.
Konstitusiya Tribunalı ətrafında münaqişə necə yaranıb?
Oktyabrın 30-da Polşanın Konstitusiya Tribunalının saytında məhkəmənin sədri Boqdan Sventsovskinin və onun müavini Bartolomey Soxanskinin bir ay müddətinə vəzifələrindən kənarlaşdırılması barədə qərar dərc olunub. Qərarı tribunalın ən təcrübəli hakimi Anna Korvin-Petrovskaya imzalayıb və bundan sonra qurumun rəhbərliyini öz üzərinə götürüb.
O, qərarını Sventsovski və Soxanskinin parlament tərəfindən qanuni şəkildə seçilmiş bütün hakimlərin iştirakı ilə ümumi iclasın keçirilməsinə mane olması ilə əsaslandırıb.
Tribunal isə öz növbəsində saytın sındırıldığını və Sventsovskinin vəzifəsini icra etməyə davam etdiyini açıqlayıb. Məhkəmə binası qarşısında PiS tərəfdarları toplaşıb və aksiya iştirakçıları ilə polis arasında toqquşmalar baş verib. Müxalifət lideri Yaroslav Kaçinski hökuməti dövlət çevrilişinə cəhddə ittiham edib.
Polşa Prezidenti Karol Navrotski hadisələri Konstitusiya Tribunalının zorla ələ keçirilməsi kimi qiymətləndirib. O, hökumətin məhkəmə binasına göndərdiyi təhlükəsizlik qüvvələrinin oradan çıxarılmasını tələb edib və parlament partiyaları ilə təcili məsləhətləşmələrə başlayıb.
Ədliyyə naziri və baş prokuror Valdemar Jurek isə prezidentin davranışını qalmaqallı adlandırıb və prokurorluğun müvafiq tədbirlər görəcəyini bildirib.
Hadisələrdən sonra Polşanın keçmiş baş naziri Mateuş Moravetski Tuskun rəhbərlik etdiyi hökumətə etimadsızlıq votumunun keçirilməsinə çağırıb. O, həmçinin yeni seçkilərədək müvəqqəti texniki hökumətin yaradılması təklifini dəstəkləyib.
Polşada Konstitusiya Tribunalının statusu və hakimlərin təyinatı ilə bağlı fikir ayrılıqları ölkədə siyasi qarşıdurmanı daha da dərinləşdirib.
12:44 01.11.2026
Oxunuş sayı: 50
