Berlində etiraz aksiyaları zamanı 60-dan çox insan saxlanılıb
Almaniyanın paytaxtı Berlində keçirilən etiraz aksiyaları zamanı 60-dan çox şəxs saxlanılıb, 27 polis əməkdaşı yüngül xəsarət alıb.
Crossmedia.az xəbər verir ki, bu barədə ölkənin hüquq-mühafizə orqanları “X” sosial şəbəkəsində məlumat yayıb.
Günorta saatlarında Brandenburq qapısı yaxınlığında “Gen Z regelt” (“Z nəsli qərar verir”) gənclər hərəkatının çağırışı ilə nümayiş keçirilib. Aksiya zamanı beş nəfər müvəqqəti saxlanılıb. Polis tədbirin ümumilikdə dinc şəraitdə keçdiyini bildirib.
Daha sonra solçu radikalların yürüşü zamanı çoxsaylı hüquq pozuntuları qeydə alınıb. Polis məlumatına görə, təxminən 60 nəfər əmlaka zərər vurmaq, xəsarət yetirmək, hüquq-mühafizə orqanlarının əməkdaşlarına müqavimət göstərmək, silah və partlayıcı maddələrlə bağlı qanunvericiliyi, eləcə də ictimai asayiş qaydalarını pozmaqda şübhəli bilinərək saxlanılıb.
Almaniyanın paytaxtında ictimai asayişin qorunması üçün ümumilikdə 1 500-ə yaxın polis əməkdaşı cəlb edilib.
Baş verən qarşıdurmalar nəticəsində 27 polis əməkdaşı yüngül xəsarət alıb. Onların hamısı xidmətlərini davam etdirə bilib.
09:46 01.11.2026
Oxunuş sayı: 55
