Xarici xəbərlər

İsveçrədə Halloween yürüşü iğtişaşlara çevrildi

İsveçrənin Sürix şəhərində radikal solçu fəalların keçirdiyi razılaşdırılmamış yürüş kütləvi iğtişaşlara və polislə toqquşmalara çevrilib.

Crossmedia.az xəbər verir ki, bu barədə “20 Minuten” qəzeti məlumat yayıb.

Şənbə günü axşam saatlarında Sürixin 4-cü rayonunda yerləşən Lanqştrasse ərazisində solçu ekstremistlərin icazəsiz nümayişi keçirilib. Maskalar və qoruyucu eynəklər taxan yüzlərlə nümayişçi militarizasiyaya, polisin fəaliyyətinə, kapitalizmə və faşizmin yayılmasına etiraz edib. Onlar, həmçinin Qəzza zolağındakı müharibəyə qarşı çıxıblar.

Nəşrin məlumatına görə, Halloween münasibətilə təşkil olunan yürüş qısa müddətdə nəzarətdən çıxıb. Hadisələr zamanı mağazaların şüşələri sındırılıb, binaların fasadları boyanıb, zibil maşınları, elektrik skuterləri və elektrik velosipedlərindən qurulan barrikadalar yandırılıb.

Qəzet yazır ki, gecə yarısından sonra əmlaka dəyən zərərin miqyası daha aydın olub və itkilərin on minlərlə dollarla ölçüldüyü bildirilib.

🖨 Çap et

10:56 01.11.2026

Oxunuş sayı: 49