AK Partinin sədr müavini: Növbəti seçkilərdə Ərdoğanı yenidən prezident edəcəyik
Türkiyədə növbəti prezident seçkiləri ilə bağlı hakim Ədalət və İnkişaf Partiyasından (AK Parti) diqqətçəkən açıqlama verilib. Partiyanın sədr müavini Hüseyn Yayman növbəti seçkilərdə hazırkı Prezident Rəcəb Tayyib Ərdoğanın yenidən dövlət başçısı seçilməsi üçün çalışacaqlarını bildirib.
Crossmedia.az xəbər verir ki, Yayman partiyasının hakimiyyətə gəlməsinin 24-cü ildönümü münasibətilə verdiyi açıqlamada Türkiyənin qarşıdakı siyasi hədəflərinə toxunaraq, Ərdoğanın ölkənin gələcək inkişafında mühüm rol oynadığını vurğulayıb.
O qeyd edib ki, AK Parti həyata keçirdiyi islahatları və xidmətləri daha da inkişaf etdirmək, Türkiyədə dövlət-vətəndaş münasibətlərini yeni mərhələyə daşımaq niyyətindədir.
AK Parti sədrinin müavini qarşıdakı seçkilərlə bağlı mövqeyini belə ifadə edib:
“İnanıram ki, inşallah, qarşıdakı seçkilərdə Prezidentimizi bir daha prezident edəcəyik. Çünki Türkiyənin Prezidentimiz Rəcəb Tayyib Ərdoğana, AK Partiyə və Cümhur İttifaqına ehtiyacı var”.
Yayman Ərdoğanın rəhbərliyi altında Türkiyənin regional və qlobal miqyasda mövqeyinin gücləndiyini iddia edib. Onun sözlərinə görə, ölkə artıq beynəlxalq münasibətlərdə söz sahibi olan və nüfuz qazanan mərkəzi dövlətə çevrilib.
13:43 01.11.2026
Oxunuş sayı: 67
