Polşada konstitusiya böhranı yenidən alovlanıb
Polşanın Konstitusiya Tribunalı ətrafında uzun müddətdir davam edən böhran yeni mərhələyə qədəm qoyub. Tribunalın sabiq sədrləri prezident Karol Navrotskinin parlamentin seçdiyi hakimlərin vəzifəyə başlamasına mane olmasını narahatedici addım kimi qiymətləndiriblər.
Crossmedia.az xəbər verir ki, UNIAN-ın “NaTemat” nəşrinə istinadən yaydığı məlumata görə, Konstitusiya Tribunalının dörd sabiq sədri məsələ ilə bağlı birgə bəyanat yayıb.
Bəyanatda parlamentin (Seymin) seçdiyi hakimlərin qanuni statusa malik olduğu bildirilib. Keçmiş hakimlərin fikrincə, Konstitusiya Tribunalı ətrafında böhran 10 ildən artıqdır davam edir. Onlar qurumun tərkibində təyinatı mübahisəli şəxslərin olduğunu və qanuni seçilmiş hakimlərin fəaliyyətinə maneələr yaradıldığını qeyd ediblər.
Sabiq tribunal sədrləri prezidentin bir neçə ay ərzində parlament tərəfindən seçilən hakimlərin vəzifəyə başlamasına mane olmasını, eləcə də son hadisələr zamanı qurumun muxtariyyətinə müdaxiləsini narahatedici adlandırıblar. Bəyanatda bu vəziyyətin tribunalın nüfuzunun və ictimai etimadın bərpasını çətinləşdirdiyi vurğulanıb.
Polşada Konstitusiya Tribunalı ilə bağlı mübahisə 2015-ci ildə, “Hüquq və Ədalət” (PiS) partiyasının hakimiyyətə gəlməsindən sonra başlayıb. Həmin vaxt hakimlərin təyinatı ilə bağlı yaranan fikir ayrılığı sonrakı illərdə hökumət, prezident və məhkəmə orqanları arasında uzunmüddətli qarşıdurmaya çevrilib.
Böhran 2026-cı ilin martında parlamentin altı yeni hakim seçməsindən sonra yenidən kəskinləşib. Navrotski onlardan yalnız ikisinin andını qəbul edib, digər dörd hakim isə andı parlamentdə, prezidentin iştirakı olmadan içib. Tribunalın mövcud rəhbərliyi bu təyinatları tanımayıb.
Oktyabrın 30-da hakim Anna Korvin-Petrovskaya tribunalın rəhbəri Boqdan Sventşkovski və onun müavini Bartlomey Soçanskinin səlahiyyətlərinin müvəqqəti dayandırıldığını elan edib və qurumun idarəçiliyini öz üzərinə götürüb. Bu qərarın qanuniliyi ilə bağlı tərəflər arasında fikir ayrılığı yaranıb.
Navrotski baş verənləri dövlət qurumunun qanunsuz ələ keçirilməsi kimi qiymətləndirib. Hadisələr tribunalın binasında qarşıdurmaya səbəb olub, prezident isə xarici səfərini yarımçıq saxlayaraq Varşavaya qayıdıb.
Noyabrın 1-nə olan məlumata görə, mübahisə həllini tapmayıb. Konstitusiya Tribunalının idarəçiliyi və yeni hakimlərin hüquqi statusu ilə bağlı fikir ayrılığı ölkədə hüquqi qeyri-müəyyənliyi və prezidentlə hökumət arasındakı qarşıdurmanı dərinləşdirir.
17:13 01.11.2026
Oxunuş sayı: 67
