ABŞ və Rusiya milyardlarla dollarlıq neft sövdələşməsini müzakirə edir
ABŞ və Rusiya arasında milyardlarla dollarlıq neft sövdələşməsi müzakirə olunur
ABŞ və Rusiya arasında Ukrayna müharibəsinin dayandırılması ilə bağlı danışıqların gündəliyinə milyardlarla dollarlıq neft sövdələşməsinin də daxil edildiyi bildirilir.
Crossmedia.az xəbər verir ki, “The New York Times” mənbələrə istinadən yazıb ki, söhbət Rusiyanın “Lukoil” şirkətinə məxsus xarici neft yataqları, emal zavodları və yanacaqdoldurma məntəqələrini əhatə edən geniş aktivlər paketindən gedir. Sövdələşmənin həyata keçirilməsi üçün həm ABŞ hökumətinin, həm də Kremlin razılığı tələb oluna bilər.
Məlumata görə, danışıqlarda ABŞ tərəfdən Stiv Uitkoff və Cared Kuşner əsas fiqurlar kimi çıxış edir. Sövdələşmə ilə maraqlanan qrupda amerikalı milyarder Todd Boeli, Yaxın Şərqdən investorlar və ABŞ hökumətinə bağlı bir strukturun da olduğu bildirilir.
NYT-nin məlumatına əsasən, Rusiya Prezidenti Vladimir Putin məsələni sentyabrın 5-də Kremldə Uitkoff və Kuşnerlə keçirilən görüşdə gündəmə gətirib. Mənbələrdən birinin sözlərinə görə, Moskva bu layihəni ABŞ və Rusiya arasında kommersiya əlaqələrinin davam etdirilə biləcəyinin göstəricisi kimi təqdim edib.
Bundan əvvəl də Rusiya və ABŞ rəsmilərinin müharibədən sonrakı dövr üçün mümkün enerji layihələri və iqtisadi əməkdaşlıq imkanlarını müzakirə etdikləri bildirilmişdi.
Hazırda sövdələşmənin yekunlaşdırılıb-yekunlaşdırılmayacağı məlum deyil. Ağ Ev, ABŞ Maliyyə Nazirliyi və “Lukoil” məsələ ilə bağlı ilkin mərhələdə şərh verməyib.
14:40 03.10.2026
Oxunuş sayı: 42
